'Egoera gainditzeko' eskatu die Ahal Duguk bere hautagaiei

Podemos-Ahal Duguren hautagai eta lider autonomiko guztiek Madrilen egindako bilera "egoera gainditzeko" baliagarria izatea espero du Pablo Echenique Ahal Duguren antolakuntza idazkariak, eta arreta osoa maiatzeko hauteskundeetan jartzeko eskatu du, Iñigo Errejonen "handinahi pertsonalak" irekitako krisiaren ostean. Errejon zen Madrilgo Erkidegoko presidente izateko Podemosen hautagaia.

"Bi egun oso tristeak izan dira, baina espero dut gaur egoera gainditu eta etorkizunera begira jarri ahal izatea. Erkidego eta udalerri gehienetan irabazi behar dugu maiatzean", esan du Echeniquek.

Echeniquek esan du "funtsezkoa" dela maiatzean emaitza onak lortzea, eta espero du Errejonen erronkak alderdiari kalterik ez egitea, batez ere muturreko eskuinak aurrera egiteko egun dagoen arriskua kontuan izanda.

"Espero dut ezetz, gure herrialdeko jendearengan konfiantza daukat, inteligenteak direlako, bestela ez nintzateke politikan egongo, errealitatea ulertzen ez dela jakingo banu. Uste dut errealitatea Aurrekontuen akordioan eta gutxieneko soldataren igoeran dagoela, eta uste dut jendeak hori ikusten duela. Horren arabera erabakiko du", gehitu du.