Aresek Ertzaintzaren laguntza eskainiko du ustezko espioitza kasurako

Rodolfo Ares Eusko Jaurlaritzako Herrizaingo sailburuak Ertzaintzaren laguntza osoa eskainiko du Arabako ustezko espioitza kasua ikertzeko.

Izan ere, beharrezkoa den Ertzaintzaren informazio eta dokumentazio osoa emateko prest agertu da Ares. Bere aburuz, "erantzukizunak zuritu ditzaten eta egoera argitu dezaten interes handiena dutenak ertzainak berak dira".

Arabako ustezko espioitza kasuaren epaileak Ertzaintza ikertzeko "eskaera ofiziala" egin zuela jakitera eman zuten atzo komunikabideek. Izan ere, "argibideetako prozesuan dokumentu gakoak ezkutatu ziren susmoa" du epaileak. Hori dela eta, "baliteke Ertzaintzaren datu baseen eta EAJko burukide ohiak zituen txostenen arteko harremana egotea", epailearen esanetan.

Bilboko Euskalduna Jauregian izandako PSEko Udal eta Foru Batzordean esan ditu Aresek aipatutako adierazpenak.