Aurrekontuak babesteko aukera 'agortutzat' eman du Elkarrekin Podemosek

Lander Martinez Elkarrekin Podemoseko bozeramaileak "agortutzat" eman du 2019ko Aurrekontuak babesteko aukera, EAJk "EH Bildurekin bakarrik negoziatzea bilatu" duelako, "merkeago aterako zaiolakoan".

Datorren urterako EAEko aurrekontuen proposamenari begira, Equo-Berdeak, Ezker Anitza-IUk eta Elkarrekin Podemosek osatutako koalizioak hartutako erabakia jakitera eman du Martinezek larunbat honetan Bilbon egindako prentsaurrekoan.

Pedro Azpiazu Ogasun sailburuarekin ostiral honetan izandako batzarraren ostean, Eusko Jaurlaritzaren "jarrera on falta" salatu zuen Elkarrekin Podemosek. Gaur, Martinezek ildo beretik jo du esanez sailburuak egindako proposamena "sakonki aztertu" dutela eta Jaurlaritzak ez duela "inolako jarrera onik".

Martinezek azpimarratu duenez, Elkarrekin Podemosek "eskua luzatuta" izan du negoziazioaren bitartean, eta eurek aldarrikatutako 15 neurriak (tartean, La Naval erreskatatzea) "sinpleak, zuzenak eta posibleak" ziren, Jaurlaritzak "zerga bidez bildutako diru kopurua inoiz baino handiagoa baita, izan ere, milioika euroren superabita dago".

"15 neurrietatik 14 errefusatu dituzte, horrek erakutsi du EAJk ez duela gurekin negoziatzeko interesik. Ez diogu Aurrekontuen babesa oparituko, are gutxiago iaz PPrekin adostutakoaren kalko bat direnean".

Elkarrekin Podemosentzat, auzi guzti horren galtzaileak "euskal herritarrak dira, enplegua, La Naval, gazteria, eta emakumezkoen eta gizonezkoen arteko berdintasuna". "EAJk uste zuen gutxi baten truke emango geniola gure babesa, baina huts egin du, ez gaude udazkeneko merkaldietan, beste batzuk dauden moduan", salatu du.

EAJrekin negoziatzea, "auzi nazionalaren mesedetan eta auzi sozialaren kaltetan, euskal herritarrentzat negoziorik okerrena da, eta kontraesan handia EH Bildurentzat, ezkerreko indarra aldarrikatzen zuelako". "Gu ez gara EAJren muleta izango", gaineratu du Martinezek, "PSE eta EH Bildu nahikoa dira horretarako".