Politika -
KONTROL SAIOA KONGRESUAN
Martuteneko kartzela itxi eta Zubietan beste bat egingo dutela iragarri du Marlaskak
Barne ministroak azaldu duenez, 200 eta 300 preso artean hartzeko tokia izango du. Kartzelaz gain, gizarteratze zentro bat ere eraikiko dute Zubietan. Dena den, ez du datarik zehaztu.
AGENTZIAK
Espainiako Gobernuak espetxe berria eta gizarteratze zentro bat eraikiko ditu Zubietan, Fernando Grande-Marlaska Espainiako Barne ministroak asteazken honetan iragarri duenez. Halaber, azpiegitura berriak ireki eta "epe laburrean" Martuteneko kartzela ixteko konpromisoa agertu du.
Diputatuen Kongresuko kontrol saioan egin du iragarpena Barne ministroak, Mikel Legarda EAJko diputatuaren galdera bati erantzunez. Ordezkari jeltzaleak azpimarratu duenez, Martuteneko kartzela ixtea adostu zuten Barne Ministerioak eta Donostiako Udalak 2005. urtean, eta 13 urte geroago espetxea zabalik dago oraindik.
Orain arte, Zubietan gizarteratze zentro bat eraikitzeko asmoa soilik agertu izan du Espainiako Gobernuak.
Marlaskaren esanetan, Zubietako zentro berriak 200 eta 300 preso artean hartzeko tokia izango du. Halaber, gizarteratze zentro bat ere eraikiko dute Zubietan, besteak beste, hirugarren graduan dauden presoek beren zigorrak betetzeko balioko du.
Dena den, Barne ministroak ez du datarik zehaztu nahi izan.
Mikel Legarda diputatu jeltzaleak, ostera, zalantzak argitu ez izana leporatu dio Barne ministroari. Gauzak horrela, Gernikako Estatutua bete eta espetxe eskumena Eusko Jaurlaritzari eskualdatzeko eskatu dio.
