Puigdemont aske utzita, auzia 'guztiz' bukatutzat eman du Alemaniako Justiziak

Carles Puigdemont estraditatzeko auzia "erabat" itxitzat eman du Schleswig-Holsteineko Lurralde Auzitegiak, bere kontrako behin behineko neurriak kenduta.

"Puigdemont aske dago, eta berehala joan daiteke Alemaniatik", esan du Frauke Holmerrek, auzitegiko bozeramaileak.

Alemaniakoa auzitegiak uztailaren 12an erabaki zuen presidente ohia soilik diru publikoa ustez bidegabe erabiltzeagatik estraditatzea, eta ez matxinada delituagatik. Espainiako Auzitegi Gorenak euroagindua atzera bota ostean, Alemaniako auzitegiak ezarritako behin behineko neurriak kendu dizkio; hala nola, 75.000 euroko fidantzapeko askatasuna eta astero poliziaren aurrean aurkeztu beharra.

"Schleswig-Holsteineko Lurralde Auzitegiko lehenengo zigor aretoak gaur erabaki du, Fiskaltzak eskatuta, Carles Puigdemont Katalunia eskualdeko presidente ohiaren estradiziorako behin behineko neurriak altxatzea, Espainiako Justiziak uztailaren 19an estradizioa baztertu ostean", dio prentsa oharrak.

Lehenago, Puigdemonten aurkako "prozeduraren oinarriak baztertuta" geratu direla iragarri du Schleswig-Holsteineko Fiskaltzak, Llarenaren erabakiaren ostean.

Presidente ohia martxoaren 25ean atxilotu zuten Alemanian, Belgikara autoz itzultzen saiatzen ari zela.