Politika -
Rajoyren ordezkoa
Saenz de Santamaria ere, PP zuzentzeko hautagai
Rajoyren Gobernuaren 'bigarrenak' agerraldia egingo du 13:00etan.
Agentzia | Erredakzioa
Soraya Saenz de Santamaria Espainiako Gobernuko presidenteorde ohiak gaur Twitter bidez iragarri duenez, Alderdi Popularra zuzentzeko hautagai izango da.
Bihar, asteazkenarekin, amaituko da hautagaitzak aurkezteko epea, eta ia azken unera arte itxaron du Saenz de Santamariak berea iragartzeko.
Buruzagi 'popularrak' agerraldia deitu du, 13:00etan hasita, Kongresuko Lehoien Atean. Aukeratutako lekuak badu garrantzia; izan ere, gainerako hautagaiek PPren egoitza aukeratu dute iragarpena egiteko.
Santamariarekin, bost dira jada Rajoyren lekua hartzeko hautagaiak: Jose Manuel Margallo, Pablo Casado, Jose Ramon Garcia Hernandez eta Jose Luis Bayo.
Alderdi Popularreko zenbait baroiren babesa edukiko luke Saenz de Santamariak, batez ere Euskadiko PPkoen artean. Alfonso Alonso EAEko Alderdi Popularraren presidenteak joan den astean nabarmendu zuenez, alderdiak eraberritze sakona behar du, eta hori gidatzeko pertsona egokia izan daiteke presidenteorde ohia.
