Gipuzkoako Aldundiak beste kereila bat aurkeztuko du Bidegi auzian

Gipuzkoako Aldundiak beste kereila bat, bigarrena, aurkeztuko du Bidegi auzian, hots, AP-1 autobidearen eraikuntzan izandako ustezko irregulartasunen kasuan, funts publikoetako 17,1 milioi euro bidegabe erabiltzea egotzita. Izan ere, Isuskitzako tuneleko lanen ordainketetan delitu zantzuak atzeman dituela azaldu du.

Larraitz Ugarte Aldundiko bozeramaileak prentsaurrekoan zehaztu duenez, bigarren kereila Agustin Zugasti Bidegiko zuendari ohiaren eta bi enpresabururen aurkakoa izango da.

Horren esanetan, EAJk zuzendutako Aldundiak egin ez ziren lan batzuen truke 8,3 milioi euro ordaindu zituztela egiaztatu dute. Gainera, joan den astean aurreratu zutenez, Arabako Aldundiak dagoeneko ordaindu zituen 8,8 milioi euro Gipuzkoakoak ere ordaindu zituela atzeman dute.

Diru publikoa bidegabe erabiltzea ez ezik, agiriak faltsutzea ere egotzi die foru erakundeak aipatutako hiru pertsonei.

Lehen kereila azaroan aurkeztu zuen Gipuzkoako Aldundiak. Orduan, AP-1 autobideko beste tarte batean 13,6 milioi euroko irregulartasunak atzeman zituela salatu zuen.