Politika -
Frankismoko krimenak
Bizkaiko Batzar Nagusiek Servini epailea babestu dute
Francoren diktadura garaian egindako krimenengatik auzipetutako 19 pertsonak atxilotzeko eta estraditatzeko eska dezala exijitu diote Espainiako Gobernuari.
Erredakzioa
Bizkaiko Batzar Nagusiek babesa agertu diote Servini de Cubria epaile argentinarrari, frankismoko krimenak ikertzeko irekitako auzibidean. Ildo berean, Espainiako Gobernuari zuzendu zaizkio, Argentinari 19 auzipeturen atxiloketa eta estradizioa eska diezaion.
Gernikan egindako osoko bilkuran, talde guztiek onartu dute EH Bilduk egindako proposamena, PPk izan ezik.
Adierazpenak 1936ko "altxamendu militar faxista eta disidentzia, justizia soziala eta eskubide nazionala odolez erreprimitu zuen diktadura" gaitzesten du.
Horrez gain, frankismo garaiko "errepresaliatuei egia, justizia eta konpentsazioa duina eta ez-baztertzailea" bermatzeko "beharrezkoak diren neurri guztiak" hartzea galdegin dute.
Amaitzeko, diktaduraren "bultzatzaileei" edo aro hartan "edozein motatako boterea" izan zutenei eskainitako edozein aipamen Bizkaiko erakunde publikoetatik kentzeko eskaera luzatu dute.
