Politika -
Hezkuntza
Uriarte: 'Lomceren gutxienekoa aplikatuko dugu, ikasleak babesteko'
Jaurlaritzako sailburuaren iritziz, legea "zentralizatzailea da eta ez du Euskadirako balio, bere helburuak aise gainditu ditugulako hemen".
Erredakzioa
Cristina Uriarte Hezkuntza sailburuak Jaurlaritza Lomceren aurka dagoela berretsi du eta legearen "gutxieneko neurriak" aplikatuko dituela iragarri du, euskal "ikasleak" babestu eta aktetan kalterik ez jasateko.
Uriarte "Garai kritikoak hezkuntzan" izeneko hitzaldiaren inaugurazioan izan da, Iñaki Goirizelaia UPV/EHUko errektorearekin batera. Hitzaldi horretan Lomce legea eta krisi ekonomikoak irakaskuntzan duen eragina aztertu dute.
Hitzaldira sartu aurretik kazetariei egindako adierazpenetan, Lomce "zentralizatzailea" dela esan du Uriartek, eta ez duela Euskadirentzat balio, "bere helburuak gure erkidegoan aise gainditu ditugulako".
"Legearen edukiek eta neurriek ez digute ezertarako balio, kontra gaude, argi eta garbi. Hala ere, Lomce indarrean dagoen lege organikoa da eta gure hezkuntza sistema eta ikasleak babestu beharra dugu, kalterik jasan ez eta ikasturtearen amaieran euren aktak eta ebaluazioak edukitzeko", azaldu du sailburuak.
Gai horren harian, Hezkuntza Saila "Lomceren gutxienekoa" aplikatzeko lanean dagoela adierazi du.
Helegitea Konstituzionalean
Halaber, sailburuak gogora ekarri du iragan astean Jaurlaritzak helegitea aurkeztu zuela Auzitegi Konstituzionalean, Lomce Lehen Hezkuntzan aplikatzearen kontra.
Helegite hori gaur arte Konstituzionalak onartutako bakarra izan da, eta Bigarren Hezkuntzari eta Batxilergoari dagokien testuak atera ahala aztertuko dituztela azpimarratu du, "eta helegitea aurkeztu behar badugu, aurkeztuko dugu".
