Udal Legea bultzatzeko lehen pausoa eman dute euskal erakundeek

Eusko Jaurlaritzak, aldundiek eta Euskal Udalerrien Elkarteak (Eudel) etorkizuneko Udal Legea bultzatzeko adostasun handiena lortzeko  lehenengo pausoa eman dute ostegun honetan. Eusko Jaurlaritzak aurten eraman nahi du Ganberara legea.

Josu Erkoreka Eusko Jaurlaritzako bozeramaileak agerraldia egin du hiru ordu eta erdi iraun duen bileraren ostean. Hasiera batean, Iñigo Urkullu lehendakaria izan du buru bilerak.

Bilera Eusko Jaurlaritzaren egoitzan, Lakuan, izan da, eta bertan Eusko Jaurlaritzako, foru aldundietako eta Eudeleko ordezkariak izan dira.

Euskadiko Udal Kontseilua (1994an sortu zen, baina 1998tik ez zen biltzen) deitu du Eusko Jaurlaritzak, Udal Legea bultzatzeko saiakeran. Jaurlaritzak urte hasierarako idatzita edukitzeko konpromisoa hartu zuen.

Halere, euskal erakundeek eman beharreko lehenengo pausoa administrazio lokalari buruzko Espainiako legearen erreformak izan ditzakeen ondorioak aztertzea da; eta hortik aurrera Euskadiren arkitektura instituzionala eraikitzea.

Euskadiko Udal Kontseiluaren bilera gai horretan oinarritu da, eta horren emaitzak Udal Legea prestatzeko balio izango du. Ondorioz, erakundeen, lehien eta euskal instituzioen arteko harremanak mugatuko ditu.

Josu Erkoreka Eusko jaurlaritzako bozeramaileak azaldu duenez, berehala lan-talde bat sortzea adostu dute, etorkizuneko Udal Legeari buruzko gai "nuklearretan" maila teknikoan eta politikoan adostasunak bilatzeko.