Politika -
Parot doktrina
Estrasburgoren erabakia 'errealitate judizial' izatea nahi du Ibarrak
EAEko Justizia Auzitegi Nagusiko presidenteak azaldu duenez, Europako Auzitegiak "azken hitza" esaten duenean, eta hala izan da, epaileek "errealitate judizial" bihurtu behar dute ebazpena.
Erredakzioa
Juan Luis Ibarra EAEko Justizia Auzitegi Nagusiko (EAEJN) presidenteak Estrasburgoko Giza Eskubideen Auzitegiak 'Parot doktrina'ri buruz emandako ebazpena "leialtasunez betetzeko" eskatu die auzitegiei.
Auzitegi Gorenak gaur erabakiko du zein irizpide ezarri 'Parot doktrina'ren inguruan, eta horri buruz galdetu diotenean egin ditu adierazpenok Ibarra epaileak, Eusko Legebiltzarreko korridorean.
Azaldu duenez, EAEJNko presidente, EAEko botere judizialaren ordezkari eta herritar den heinean, ebazpena betetzea espero du, Estrasburgoko Auzitegia "berme sistemaren maila gorenean" dagoelako.
EAEko Justizia Auzitegi Nagusiko presidentearen arabera, Europako Auzitegiak "azken hitza" esaten duenean, eta hala izan da, epaileek "errealitate judizial" bihurtu behar dute ebazpena.
Horretarako, prozedura batzuk jarraitu eta irizpideak bateratu behar direla gogorarazi du Ibarrak, eta horretara dator Auzitegi Gorenak gaur hartuko duen erabakia.
