CNIko zuzendariak espioitzari buruzko azalpenak emango ditu Kongresuan

Felix Sanz Roldan Espainiako Inteligentzia Zentroko (CNI, gaztelaniaz) zuzendariak agerraldia egingo du Kongresuko Sekretu Ofizialeko Batzordean espioitza kasuak direla eta. Hala iragarri du asteazken honetan Mariano Rajoy Espainiako gobernuburuak. AEBko Segurtasun Agentzia Nazionalak (NSA) Espainiako 60 milioi dei zelatatu zituela zabaldu zenetik, ustezko espioitzaren afera bolo-bolo dabil.

Rajoyk agerraldia egin du Kongresuan, joan den astean Europako Batzordean adostutakoen berri emateko. Bertan adierazi duenez, Gobernuak "oso serio hartu du" hedabideek espioitzaren inguruan zabaldutako informazioa.

Hain justu, James Costos AEBk Espainian duten enbaxadorearekin astelehenean egindako bileran Espainiako Gobernuaren "kezka" agerian geratu zela esan du presidenteak. Erantsi duenez, "zenbait kontu, egiazko balira, desegokiak eta onartezinak lirateke bazkide eta lagunen artean".