EH Bildu: 'EAJren eta PSEren arteko akordioan ez dago neurri zehatzik'

EH Bilduk EAJ eta PSEren arteko ituna kritikatu du. Koalizio abertzalearen aburuz, "orokortasunez beteta" dago eta "ez du Madrildik datozen murrizketei aurre egiteko neurri zehatzik jasotzen". Hori dela eta, "denen artean euskal bidea zehazteko" deia luzatu du, eta asteazken honetan "bide horretan aurrera egiteko proposamena" egingo dutela iragarri du.

Donostian egindako prentsaurrekoan, Unai Ziarreta eta Rebeka Ubera EH Bilduko ordezkariek itunaren irakurketa "kritikoa" egin dute. Jeltzaleek eta sozialistek "akordio ilusiogarri eta berritzaile" bezala aurkeztu nahi duten arren, "PSEk lehen hartu zituen, eta euskaldunentzat kaltegarri izan diren, oinarri politikoetatik dator ituna", esan dute.

Ziarreta eta Uberak adierazi dutenez, ituna "atzerapausoa" da koalizioak Gipuzkoan garatzen duen ereduarekin alderatuz gero. "Madrildik datozen murrizketei aurre egiteko zehaztapenik ez du jasotzen", gaineratu dute.

"Denen artean euskal bidea zehazteko unea da", azpimarratu dute. Asteazken honetan EH Bilduk "bide horretan aurrera egiteko proposamen zehatza" egingo duela irragarri dute.