Etxerat: 'Egun erabakigarria da, giza eskubideak jokoan daudelako'

Etxerat presoen senitartekoen kolektiboak asteazkena "egun erabakigarria" izango dela uste du, "giza eskubideak jokoan daudelako".  Espainiak Parot doktrina babesteko helegitea aurkeztu zuen eta Estrasburgoko Giza Eskubideen Auzitegiak erabakia hartu behar du orain.

Presoen 40 bat senitartekok agerraldia egin dute gaur Iruñean, Auzitegiaren erabakiaren bezperan. Ines del Rio ETAko presoa askatzeko eta 30.000 kalte-ordaina emateko agindua eman zuten, baina Espainiako Gobernuak erabakiaren aurka helegitea aurkeztu zuen Estrasburgoko Giza Eskubideen Auzitegiaren aurrean. Madril taldeko kidea izatea egotzita 3.000 urteko espetxe zigorra ezarri zioten Del Riori. 23 hilketa leporatu zizkioten.

Alde batetik, Estrasburgoko Giza Eskubideen Auzitegiak "askatasun eskubidea urratzen duen" doktrinaren inguruan erabaki beharko duela azaldu du presoen senitartekoen kolektiboak; bestetik, "Espainiako Estatuak urraketa hau inongo oztoporik eta trabarik gabe mantendu nahi du".