Werten erreformaren aurkako manifestazioak 'siglarik' gabe egingo dira

ELA, LAB eta STEE-EILAS sindikatuek adierazi dutenez, larunbaterako, martxoaren 2rako, Hezkuntza Kalitatea Hobetzeko Lege Organikoaren (LOMCE) aurka deitu diren manifestazioak "siglarik" gabe egingo dira, erantzun "zabala eta irmoa" lortzeko helburuarekin. Era horretan, hezkuntza eragile guztiei parte hartzeko dei egin diete, horien artean CCOO eta UGT sindikatuei, eta EAEko eta Nafarroako gizarte osoari.

Hiru sindikatuetako bozeramaileak Bilbon egon dira ikasleen, gurasoen eta sektoreko langileen ordezkariekin batera. Bertan, ohar bat irakurri dute hezkuntza sisteman murrizketak onartuko ez dituztela ziurtatuz.

Halaber, "baliabide eta inbertsio gehiago" eskatu dituzte. "Euskal Herriko hezkuntza eragileek eta euskal gizarteak behar dugun hezkuntza erabaki behar dugu", aldarrikatu dute.

Hori dela eta, EAEko eta Nafarroako Gobernuei eta bertako alderdi politiko guztiei "proiektu horri aurre egiteko" eta "gure herrian ez ezartzeko" eskaera egin diete. Euren iritziz, "erantzun irmoa eta zabala" beharrezkoa da.