4 lagun atxilotu dituzte, Kataluniako ustezko espioitza politikoagatik

Francisco Marco Metodo 3 detektibe agentziako zuzendaria eta enpresa horretako beste hiru langile atxilotu ditu Poliziak astelehen honetan, Kataluniako ustezko espioitza politikoaren sarearekin zerikusia dutelakoan. Zehazki, sekretuak agerraraztea egotzita atxilotu dituzte, polizia iturriek Efe agentziari jakinarazi diotenez.

Francisco Marcorekin batera, Elisenda Villena, Julian Peribañez eta Alex Borreguero atxilotu dituzte. Poliziak Katalunian duen egoitza nagusira eraman dituzte.

Espainiako Polizia Katalunian ustez hainbat politikariri espioitza egin dion sare bat ikertzen ari da, La Vanguardia egunkariak jakinarazi duenez.

Kazeta horren arabera, Poliziak espioitza egon dela frogatzeko "zantzu sinesgarriak" ditu. Horien arabera, Metodo 3 detektibe agentziak egin du espioitza, Bartzelonako La Camarga jatetxean eta politikariak eta enpresaburuak joan ohi diren beste lokal batean.

Alicia Sanchez-Camacho Kataluniako PPko presidenteak salaketa aurkeztu zuen atzo Metodo 3ren aurka, 2010. urtean La Camarga jatetxean Jordi Pujol Ferrusolaren neska-lagun ohi batekin izan zuen solasaldi bat grabatzea egotzita.

Solasaldi horretan, Maria Victoria Alvarez Martinek Jordi Pujol Kataluniako presidente ohiaren seme zaharrenari buruzko informazioa eman zion Camachori. Hain zuzen ere, Pujol Ferrusola Andorra joan ohi zela eta bidaia horietako batean 500 euroko billeteak eraman zituela esan zion.

'Amaierara arte' ikertuko duela dio Poliziak

Espainiako Polizia Katalunian hainbat politikariri espiatu eta grabatu omen zituen sare bat ikertzen ari da. Astelehen honetan, Poliziako arduradun nagusiek esan dute alderdi politikoei egindako ustezko espioitzek alarma soziala eragin dutela, eta gertaerak argitzeko "amaieraraino" iritsiko direla argi utzi dute.

Francisco Martinez Estatuko Segurtasun idazkariak eta Ignacio Cosido Poliziako zuzendari nagusiak esan dutenez, ikertzaileak "interes handiz" lanean ari dira, baina ez dute Kataluniako arduradun nagusiekin izandako bileraren inguruko xehetasun gehiago eman nahi izan.

Gai horren harira, Barne Ministerioa, Espainiako Gobernua eta gizartea oro har arduratuta daudela esan du Francisco Martinezek.

"Arinkeria litzateke hori ukatzea", gaineratu du Martinezek. Horren esanetan, Polizia interes handiz ikertzen ari da, eta beharrezkoak diren bilera guztiak egingo dituzte gaiaren muinera heldu arte.