Politika -
Ustezko ustelkeria auzia
Polizia espioitza politiko sare bat ikertzen ari da Katalunian
Metodo 3 detektibe agentziak hainbat politikariri espioitza egin dien ikertzen ari da Polizia.
Erredakzioa
Espainiako Polizia Katalunian ustez hainbat politikariri espioitza egin dion sare bat ikertzen ari da, La Vanguardia egunkariak jakinarazi duenez.
Kazeta horren arabera, Poliziak espioitza egon dela frogatzeko "zantzu sinesgarriak" ditu. Horien arabera, Metodo 3 detektibe agentziak egin du espioitza, Bartzelonako La Camarga jatetxean eta politikariak eta enpresaburuak joan ohi diren beste lokal batean.
Horren ildotik, Metodo 3 agentziarekin lan egin duten pertsonek legez kanpoko grabazioak ote dituzten eta horiek "salerosteko" baldintzetan dauden argitu nahi dute poliziek.
Alicia Sanchez-Camacho Kataluniako PPko presidenteak salaketa aurkeztu zuen atzo Metodo 3ren aurka, 2010. urtean La Camarga jatetxean Jordi Pujol Ferrusolaren neska-lagun ohi batekin izan zuen solasaldi bat grabatzea egotzita.
Solasaldi horretan, Maria Victoria Alvarez Martinek Jordi Pujol Kataluniako presidente ohiaren seme zaharrenari buruzko informazioa eman zion Camachori. Hain zuzen ere, Pujol Ferrusola Andorra joan ohi zela eta bidaia horietako batean 500 euroko billeteak eraman zituela esan zion.
Poliziak, baina, espioitza jasan duten politikariak gehiago izan litezkeela uste du.
El Mundo egunkariak Jose Zaragoza PSCko Antolakuntza idazkariari egotzi dio solasaldi hori grabatzea agindu izana, baina horrek ukatu egin du.
2009. eta 2011. urteen artean, PSCk Metodo 3 taldeko hainbat enpresa kontratatu zituen, bere egoitzaren segurtasuna kontrolatzeko.
Jorge Fernandez Diaz Barne ministroaren esanetan, "informazio ugari" dute eta Poliziak "ikerketa sakona" egingo du.