Mundua -
GERRA KOMERTZIALA
Von der Leyenek ziurtatu du Europar Batasunak "plan sendoa" duela Trumpen muga-zergei aurre egiteko
Europako Batzordearen presidenteak azpimarratu du "irtenbide negoziatua" lortzea dela helburua, baina gogorarazi du konfrontazioa ez duela Europak hasi, eta adierazi erantzuteko "karta" asko dituela eskuetan.
AGENTZIAK | EITB Media
Ameriketako Estatu Batuek mundu osoko autogintza-produktuen gainean ezarritako % 25eko muga-zergak etzi sartuko dira indarrean. Europar Batasunak oraindik ez du argitu nola erantzungo duen, baina Ursula von der Leyen Europako Batzordearen presidenteak iragarri du Europar Batasunak "plan sendoa" prestatu duela.
Europako Parlamentuaren aurrean egin duen agerraldian azpimarratu duenez, AEBko presidente Donald Trump presidentekin "irtenbide negoziatua" lortzea da helburua. Hala ere, gogorarazi du konfrontazioa ez duela Europak hasi, eta, behar izanez gero, erantzuteko "plan sendoa" gertu duela.
"Behar izanez gero, gure interesak, gure jendea eta enpresak babestuko ditugu", esan du Europako Batzordearen presidenteak, "konfrontazioa" inoren interesekoa ez dela uste arren.
Von der Leyenen esanetan, Trumpek ezarri nahi dituen muga-zergak "amesgaizto" izango dira Ameriketako Estatu Batuetako inportatzaileentzat. "Gaur egun, inork ez du horrelakorik behar, ez AEBk, ez Europak", gaineratu du.
Muga-zergak handitzeak inflazioa handitzea eta lanpostuak galtzea eragingo duela nabarmendu du Von der Leyenek. "Hori guk lortu nahi dugunaren kontrakoa da", azpimarratu du.
Testuinguru horretan, Von der Leyenek ziurtatu du Europar Batasunaren eta Ameriketako Estatu Batuen arteko balantza komertziala "ia-ia orekatuta" dagoela. Dena den, Trumpen administrazioarekin lan egiteko prest agertu da.
Gauzak horrela, Europar Batasunak ez du gatazkaren bidea hartu nahi, baina ohartarazi du Europak "erantzuteko karta asko" dituela.