Mundua -
SU-ETENA GAZAN
Hamasek errefusatu egin du su-etenaren lehenengo fasea luzatzeko proposamena
Mugimendu islamistak baieztatu du ez dutela negoziaziorik martxan bigarren faseari begira.
agentziak | eitb media
Hamas mugimendu islamista palestinarrak errefusatu egin du Israelekin duen su-etenaren akordioko lehenengo fasea luzatzea, eta baieztatu du gaur egun ez dagoela negoziaziorik su-etenaren bigarren faseari ekiteko.
Hazim Qasem Hamasen bozeramaileak esan du lehenengo fasearen luzapena onartezina izango litzatekeela, "berriro zerotik hasteko" Israel egiten ari den ahalegina besterik ez delakoan.
Qasemek Al Arabiyan adierazi duenez, Israelek prozesua atzeratzeko duen estrategia da hori, ez dituelako Gazako Zerrendan dituen indarrak erretiratu nahi.
Israelen ordezkaritzak proposamen hori egin zien ostiralean bitartekariei (Egipto, Qatar eta AEB) Kairon egindako batzar batean; lehen fasea 42 egun luzatzea Gazan dauden 63 bahituak askatzeko, hain zuzen ere.
Su-etenaren lehenengo fasea, urtarrilaren 19an indarrean sartu zena, gaur amaituko da, eta ez dago argi ondoren zer gertatuko den.
Israelek proposamen hori egin zuen Gazako Zerrendaren etorkizunari buruzko akordioa atzeratzen duen bitartean. Donald Trump AEBko presidenteak palestinarrak bertatik kanporatzea eta "Ekialde Hurbileko Riviera" eraikitzea nahi du, eta hori erakusten duen bideo bat argitaratu du aste honetan bertan.