Mundua -
Alemaniako hauteskundeak
Kontserbadoreak dira garaile Alemanian, eta ultraeskuina bigarren indarra
CDU-CSU batasun demokristauak botoen % 28,6 jaso ditu. AfD ultraeskuindarrak, berriz, aurreko hauteskundeetako datuekin konparatuta, botoak bikoiztu ditu, % 20,8 lortuta. Olaf Scholz kantzilerra hirugarren geratu da, botoen % 16,4rekin.
AGENTZIAK | EITB MEDIA
Lehen datuen arabera, Batasun Kristau-Demokratak (CDU) eta Bavariako Batasun Sozial Kristauak (CSU) osatutako blokea (CDU/CSU) da lehen indarra Alemaniako hauteskundeetan, botoen % 28,6 lortuta. AfD ultraeskuindarra, berriz, bigarren alderdi bozkatuena izan da, bozen % 20,8 jasota. Horrek esan nahi du ia bikoiztu egin duela boto kopurua 2021eko hauteskundeetako emaitzekin alderatuta.
Gauzak horrela, eskuin-muturrak inoizko emaitzarik onenak lortu ditu, nahiz eta gainerako alderdiek koalizio-gobernua osatzeko adina babes duten.
Orain arteko kantzilerrak, Olaf Scholzek, berriz, botoen % 16,4 erdietsi ditu. Atzetik ditu Berdeak (% 11,6), Ezkerra (% 8,8), Alderdi Demokratiko Askea edo FDP (% 4,3) eta Sahra Wagenknecht Aliantza edo BSW (% 4,9). Azken bi indar horiek parlamentutik kanpo geratu dira, Behe Ganberan sartzeko ezinbestekoa baita botoen % 5 lortzea.
Emaitzon arabera, CDU/CSU blokeak 208 eserleku izango ditu; AfDk, 152; SPDk, 120; Berdeak, 85; Ezkerrak, 64 eta SSW alderdiak, eserleku bat.
Hori horrela, Merzek sozialdemokratekin bakarrik osatu ahalko du koalizio gobernua, Sahra Wagenknecht (BSW) ezkerreko aliantza Bundestagetik kanpo geratu baita. Izan ere, alderdi hori ganberan egonda, zenbakiak kontra edukiko lituzke Merzek eta Berdeekin hiruko gobernua negoziatzera behartuta egongo litzateke (hautagai kontserbadorea horren kontra azaldu da hasieratik). Ganberako gehiengo osoa 316 botokoa da, eta kontserbadore eta sozialdemokraten batura 329 da.
Parte-hartzea % 82,5ekoa da, duela lau urteko hauteskundeetan izandakoa baino sei puntu gehiago.