Gutxienez 62 atxilotu Amsterdamen, Maccabi taldeko jarraitzaileen eta Palestinaren aldekoen arteko istiluetan

Gutxienez 62 pertsona atxilotu dituzte eta bost pertsona zauritu dira, bart, Amsterdam hirian, Tel Aviveko Maccabi futbol taldeko jarraitzaileen eta Palestinaren aldeko manifestarien artean izandako istiluetan, Amsterdameko Poliziak X sare sozialean baieztatu duenez. Israelgo Gobernuak bi hegazkin bidaliko ditu Herbehereetara bere futbol partidaren harira hara joandako herritarrak "erreskatatzeko". 

Bahitutako eta desagertutako pertsonak egon ote daitezkeen ikertzen ari dira, baina oraingoz ez dute baieztatu horrelakorik gertatu.

Herbehereetako Polizia Amsterdameko Ajax eta Tel Aviveko Maccabi taldeen arteko futbol partidaren aurretik eta ondoren gertatutakoa ikertzen ari da, eta eguerdian emango ditu xehetasunak prentsaurrekoan.

Bertako hedabideek jakitera eman dutenez, partidaren aurretik Maccabiko ehunka jarraitzaile erdiguneko Dam plazan elkartu ziren, Palestinaren aldeko hainbat manifestari elkartu ziren toki berean, eta istiluak gertatu ziren.

Futbol partida amaitu ondoren hasi ziren istiluak Johan Cruyff Arena estadioaren inguruan. Kanpoan, Palestinaren aldeko dozenaka manifestari elkartu ziren Israelgo taldeak Europako lehiaketatik kanporatu ez dutela salatzeko.

Israelek Maccabiko jarraitzaileen aurkako eraso antisemitak salatu ditu, baina Herbehereetako agintariek ez dute oraingoz gertakarien kronologiari buruzko adierazpenik egin. 

Benjamin Netanyahuren Gobernuaren arabera, Tel Aviveko Macabbiko ehunka jarraitzaileri "segada" egin zieten Amsterdamen, Ajax taldearen aurka jokatutako Europa Ligako partidaren ostean eta gutxienez 10 israeldar zauritu ziren. Gideon Sa 'ar Israelgo Atzerri ministroa Herbehereetako agintariekin harremanetan jarri da jarraitzaileei hoteletik aireportura laguntzeko.

Istiluak eragin dituztenen aurka "irmo eta azkar" erantzuteko eskatu die Israelgo lehen ministroak Herbehereetako agintariei.

Bestalde, Dick Schoof Herbehereetako lehen ministroak israeldarren aurkako "eraso antisemitak erabat onartezinak" direla salatu du. Are gehiago, erasotzaileak aurkitu eta auziperatu egingo dituztela esan omen dio telefono dei batean Israelgo gobernuburuari.