AEBko bost estatuk aborturako eskubidea Konstituzioan jasotzea bozkatu dute eta Floridak debekuari eutsi dio

Ameriketako Estatu Batuetako hauteskundeetan herrialdeko presidentea aukeratzeaz gain, Ordezkarien Ganbera eta Senatua berritu dute. Halaber, hainbat estatutan abortuari buruzko galdeketak egin dituzte. Bertako hedabideen proiekzioen arabera, New York, Arizona, Colorado, Maryland eta Misuri estatuetan aborturako eskubidea estatu mailan babestearen alde bozkatu dute; Floridan, berriz, proposamenaren aurka egin dute.

Aipaturiko bost estatu horietan aborturako eskubideari eutsiko diote. Floridan, berriz, ez dute abortua legez babesteko beharrezkoa zen botoen % 60 eskuratu eta, hortaz, gaur arte legez, ezingo da abortatu haurdunaldiaren seigarren astetik aurrera.

Beste hiru estatutan ere Montana, Nevada eta Hego Dakotan abortua legez babestearen aldeko galdeketak egin dituzte. Nebraskan, aldiz, gaur egun indarrean dagoen debekua egonkortzea da galdeketaren helburua.

2022ko ekainean, AEBko Auzitegi Gorenak haurdunaldia eteteko eskubide konstituzionala bertan behera uztea erabaki zuen hamar estatutan. Abortuaren aldekoek galdeketak egiteko nahikoa sinadura bildu dituzte eta gaiari buruzko bozketa egitea lortu dute hainbat estatutan, azaroaren 5eko hauteskundeak baliatuz.