Albiste izango dira: Hauteskunde eguna AEBn, goialdeko borraska Valentzian eta Manuel Lekuona saria

Honako gai hauek hartuko dituzte gaur, 2024ko azaroaren 5ean, hedabideetako lerroburu nagusiak:

- Hauteskunde eguna AEBn: Iritsi da AEBko hurrengo presidentea izango dena aukeratzeko bozketa eguna. Ameriketako Estatu Batuetako herritarrek Kamala Harris hautagai demokrataren eta Donald Trump hautagai errepublikanoaren artean aukeratu beharko dute. Gaur egun presidenteorde denak jarraipena eman nahi dio egungo Gobernu demokratari, eta Donald Trump presidente ohia Etxe Zurira itzultzen saiatuko da. Inkestek berdinketa teknikoa iragartzen dute bi hautagaien artean.

- Goialdeko borraskaren ondorioak: Espainiako Gobernuko Ministroen Kontseiluak gaur onartuko du goialdeko borraskak (GOIDI ere deitua) gehien kolpatu dituen guneak babes zibileko larrialdi batek larriki kaltetutako eremu izendatzea. Horrez gain, Espainiako Gobernuak premiazko lege-dekretu bat ere onartuko du, kaltetuentzako laguntza ekonomiko, laboral eta fiskalekin. Valentziako Erkidegoaz gain, Gaztela-Mantxa, Andaluzia, Katalunia eta Aragoi dira maila altuetan depresio isolatuagatik kalte gehien jasan duten eremu geografikoak.

- Manuel Lekuona saria: Juan Mari Beltran musika interpretatzaile, ikertzaile, sustatzaile eta irakasleak irabazi du aurtengo Manuel Lekuona saria. Eusko Ikaskuntzaren Manuel Lekuona Saria 1983an sortu zen Euskal Komunitate Globalarentzat ekarpen garrantzitsua izan zitekeen lana (opera omnia) egin duten pertsonei aitorpena egiteko. Beltranen kasuan, euskal musikaren alde 50 urtetik gora egindako lana aitortu diote. 2024ko Manuel Lekuona sariaren banaketa ekitaldia 2025eko udaberrian egingo da.