Mundua -
ekialde hurbila
Netanyahuren etxebizitza droneekin erasotzen saiatu dira
Erasoa gertatu denean Israelgo lehen ministroa eta bere familia ez zeudela etxean esan du Israelek. Bien bitartean, gutxienez 33 pertsona hil eta 70 zauritu dira Israelek Gaza iparraldeko Jabaliako errefuxiatu-eremuan egindako erasoan.
eitb media
Benjamin Netanyahu Israelgo lehen ministroak Zesarea hirian duen egoitza pribatura droneak erabiliz egindako eraso bat salatu du Israelek.
Lehen ikerketen arabera, Hezbollah milizia xiitak egin du. Libanotik Israelera zihoazen hiru drone identifikatu ditu Israelek. Horietako bi geldiarazi dituzte eta hirugarrena Zesarea hirian erori da, Israelgo Armadak jakitera eman duenez.
Erasoa gertatu denean, Benjamin Netanyahu eta bere emaztea ez zeuden etxean, ezta familiako inor ere. Erasoak ez duela biktimarik eragin esan dute lehen ministroaren iturriek.
Bien bitartean, gutxienez 33 pertsona hil eta 70 zauritu dira gaur goizaldean Israelek Gaza iparraldeko Jabaliako errefuxiatu-eremuan egindako erasoan. Alabaina, hildakoak 50 izan daitezke, hainbat egoiliar hondakinen artean harrapatuta gelditu direlako, bertako hedabideen arabera.
Beste bi pertsona hil dira Libanon, Beirut iparraldean dagoen Jounieh herrian, Israelgo Armadak droneak erabiliz egindako eraso batean.