Migrazio-ituna aplikatzeko eta deportazioak azkartzeko deia egin dute EBko buruzagiek goi-bileraren hasieran

Europar Batasuneko buruzagi gehienak migrazio-ituna azkar aplikatzearen gainean mintzatu dira eta horietako asko legez kanpoko migrazioari aurre egiteko "formula berritzaileei" buruz hausnartzeko prest daude, Batasunetik kanpo pertsona migratzaileak atxikitzeko zentroak jarrita, esaterako.

Simon Harris Irlandako lehen ministroak bilerara iritsi berritan esan duenez, migrazio politikan formula berritzaileak bilatzearen aldekoa da, beti ere, nazioarteko zuzenbidea eta Batasunaren "balore komunak" errespetatuz egiten bada.

Bestalde, Olaf Scholz Alemaniako kantzilerrak adierazi du, Italiak Albaniarekin sinatu duen akordioa ahotan, pertsona migratzaileak EBtik kanpora eramatea ez dela irtenbidea Alemania bezalako herrialde handi batentzat.

Lituania eta Eslovenia, bere aldetik, prest agertu dira hirugarren herrialdeetan migratzaileentzako zentroak sortzeko aukera aztertzeko.

Europar Batasuneko agintariak Ekialde Hurbileko eta Ukrainako gatazkei buruz hitz egiteko bildu dira, baina migrazioaren eztabaida indartsu sartu da Ursula Von der Leyen Europako Batzordeko presidenteak "formula berritzaileei" buruz hausnartzeko egindako proposamenarekin, hala nola Batasunetik kanpo pertsona migratzaileak "identifikatzeko eta atxikitzeko zentroei" buruz.

Agintariek gaiaz eztabaidatuko dute, Von der Leyenek aste honetan bidali dien gutuna oinarri hartuta. Gutun horrek hamar ekintza-arlo planteatzen ditu, migrazio- eta asilo-ituna (2026an aplikatu beharko litzatekeena) azkar abiaraztea barne, eta migrazioaren aurkako "formula berritzaileak" lantzea, EBtik kanpo migratzaile-zentroak martxan jartzeari buruzko gogoeta barne.

Batzuek argi eta garbi egiten dute migrazio-ituna azkar aplikatzearen alde, hala nola Espainiak, Frantziak eta Alemaniak. Beste batzuk, Polonia, esaterako, kritiko agertzen dira Europako migrazio-politikarekin. Hain zuzen ere, herrialde horrek aste honetan bertan neurriak hartu ditu asilo eskubidea aldi baterako bertan behera uzteko, bere mugen "kontrola berreskuratzeko", Bielorrusiarekin duena kontrolatzeko, batik bat.

Horrela, Italia indartsu sentitzen da EBn haren jarrerarekin bat egiten duten gobernuak gero eta gehiago direlako. Georgia Meloni Italiako eskuin muturreko lehen ministroak eskertu egin du Europako Batzordea Albanian zentroak irekitzeko ideia polemikoa aztertzen hasi izana.

"Herrialde asko daude Italiaren eta Albaniaren arteko protokoloari begira, bai eta Italiak azken urteotan migrazioan bultzatu dituen politikei ere", azpimarratu du Melonik. Testuinguru horretan, Italiak jakitera eman du Europako goi-bilera hasi baino lehen Danimarkarekin eta Herbehereekin batzartuko dela.

"Konponbide pragmatikoen alde lan egin eta emaitzak ikusi nahi dira", nabarmendu du Italiako buruzagi eskuinzaleak, eta eskerrak eman dizkio Von der Leyeni, egindako ahaleginek "fruituak ematen ari direlako".

Ukraina, Ekialde Hurbila eta Venezuela

Hala ere, buruzagiek Volodimir Zelenski Ukrainako presidentearekin hasiko dute bilera; izan ere, Charles Michel Europako Kontseiluko presidenteak gonbidatu du Garaipenaren Plana delakoa azaltzeko.

Ekialde Hurbileko gatazka ere mahai gainean izango dute buruzagiek, eta Israelek Nazio Batuen Erakundeak Libanon duen misioari (UNIFIL) egindako erasoak gaitzestea espero da.

Nazioarteari dagokionez, buruzagiek Venezuelako krisi politikoari ere helduko diote, Espainiak hala eskatuta.