Mundua -
gaza erasopean
Gutxienez bederatzi palestinar hil eta 13 zauritu dira Zisjordania iparraldeko erasoetan
Horietatik lau Tubaseko errefuxiatuen kanpalekuan egindako erasoan hil dira, eta beste hiru airez egindako eraso batean, Yeningo probintzian, auto barruan zeudela. Gainera, gutxienez hamairu pertsona zauritu dira eraso horien ondorioz.
agentziak | eitb media
Gutxienez bederatzi palestinar hil dira eta beste hamairu zauritu ziren bart, Israelgo Armadak Zisjordania okupatuaren iparraldean egindako airez zein lurrez egindako erasoetan.
Eraso horietako batean lau pertsona hil eta zortzi zautiru dira, Farako errefuxiatuen kanpalekuan izandako erasoan, Tubaseko eskualdean, Palestinako Ilargi Gorriaren iturrien arabera.
Yeningo probintzian izandako erasoan beste bost palestinar hil eta hiru zauritu dira; horietako hiru airez egindako eraso batean, bere ibilgailuan zeudela, Yeningo hego-ekialdean, Seir herrian. Gainera, hiru pertsona zauritu dira Tulkarem eskualdean, non Israelgo Armadak bertan jarraitzen duen.
Israelgo Armadak "terrorismoaren aurkako operazio" bat hasi du gaur goizean Zisjordaniako iparraldean, "mehatxu terroristak" berehalakoan desagertzeko eta biztanleria zibilari kalte egiteko.
Armadaren bozeramaileak esan du hildako palestinarrak armatuta zihoazela eta lehergailuak zituztela.