Israelek Al-Hudaidako portua bonbardatu du Yemenen, huthiek Tel Aviven egindako erasoari erantzunez

Israelgo hegazkinek Al-Hudaida (Yemen mendebaldea) bonbardatu dute larunbat honetan, Yemengo gerrillarien hegazkin batek Israelen aurka eraso egin eta 24 ordura. 

Hildakoak daudela aurreratu dute baina ez dute, momentuz, hildakoen inguruko datu zehatzik eman. Zaurituei dagokionez, hutien aldeko agentziek diotenez, "gutxienez 80 lagun zauritu dira, gehienak erredura larriekin, Al-Hudaidako petrolio-deposituen eta planta elektrikoaren kontra egindako erasoan". 

Israelgo Aire Armadak Al-Hudaida (Itsaso Gorria) portuaren kontra larunbat honetan egindako erasoak matxino huthientzat Irandik armak inportatzea eragotzi nahi izan du, Israelgo Armadako bozeramaile batek baieztatu duenez.

"Al-Hudaida portua Iranetik Yemenera armak sartzeko bide gisa erabiltzen dute huthiek", esan du Nadav Shoshani Israelgo Armadaren bozeramaileak hedabideen aurrean egindako agerraldi batean.

Shoshaniren esanetan, matxinoek Israelen aurkako dozenaka erasotan erabili duten Irango "munizio aurreratua" sartzeko bidea zen. Horrez gain, ordea, bere iritziz mundu mailako "ordena ekonomikoa ere nahastu" dute hutiek, taldeak Itsaso Gorrian nazioarteko zamaontzien aurka egindako indarkeriari erreferentzia eginez.

Eraso honekin erantzun dio Israelek ostriralean Yemenetik Tel Avivera jaurtitako drone irandar batekin egindako erasoari, izan ere zibil israeldar bat hil zuten eraso horretan; baina, era berean, azken bederatzi hilabeteetan huthiek Israelen aurka jaurtitako 220 drone, gurutze-misil eta misil balistiko baino gehiagori erantzuteko modua ere izan da, Shoshaniren arabera.  

"Hau Israelen erasoa izan da", esan du behin baino gehiagotan Shoshanik, Al-Hudaidaren aurkako operazioa AEBekin eta Erresuma Batuarekin koordinatuta egin dutela dioten zurrumurruak isiltzeko. Era berean, gogorarazi du, "erasoek jarraitzen badute, Israelek bere burua defendatzeko egiten dituen ekintzei eutsiko" diela.

Bestalde, Yemengo hutien Kontseilu Politiko Gorenak ohartarazi duenez, Israelek Al-Hudaidako portuaren kontra egindako erasoei "erantzun eraginkorra" emango diete. "Eraso basati honek Yemengo herriaren eta bere Indar Armatu ausarten determinazioa, erresistentzia eta babesa areagotzen ditu", nabarmendu du Mohamed Abdulsalam Ansarula hutien alderdiko bozeramaileak.

"Yemengo herria, Alari esker eta Alaren laguntzarekin, erronka guztiei aurre egiteko gai da, zapaldutako Palestinaren eta Gazako herriaren garaipena lortzeko, munduan den kausarik bidezkoena", argudiatu du, Al Mayadin Yemengo egunkariaren arabera.

Hizbulak "arduragabekeria"-tzat jo du Israelen erasoa

Libanoko Hizbula talde xiitaren ustez, Israelek Yemenen aurka egindako erasoa "etsai sionistak hartutako neurri arduragabea da", eta "eskualde osoan garrantzi handiko konfrontazio fase berri eta arriskutsu" baten hasiera markatzen du. Hala adierazi du huthiekin eta Irakeko beste talde batzuekin batera, Israelen aurkako ardatz proiraniarra osatzen duen Libanoko taldeak. 

"Ziur gaude Yemengo agintariak, euren ezagutza, kemena eta indarrarekin, gai direla beharrezko neurriak hartzeko, etsai honen eta horren eskualdeko eta nazioarteko aliatuak uxatzeko", gaineratu du.

Era berean, berretsi dutenez, "Yemengo herriarekin guztiz bat egiten dugu bere burujabetzaren eta jarrera heroiko eta historikoaren defentsan, bai eta Palestinarekin, bere herriarekin eta bere erresistentziarekin ere".

Hizbula eta Israel borroka sutsuetan dabiltza urriaren 8tik, Gazaren aurkako erasoaldi handia hasi eta biharamunetik, eta 2006ko gerratik izan dituzten liskarrik latzenak izan dira.

Larunbat honetan bertan, Hizbulak Adlounen (Libano) duen munizio biltegi bati eraso dio Israelek, Israelgo mugatik 40 kilometro iparraldera.