Keir Starmerrek "hiltzat" jo du 'Ruanda plana', Gobernuaren erronkak aurkeztu dituen agerraldian

Keir Starmer Britainia Handiko lehen ministro laborista izendatu berriak larunbat honetan adierazi duenez, bere Gobernuak "politika berriak" jarriko ditu martxan, Erresuma Batuko hauteskunde orokorretan lortutako gehiengo argiaren babesarekin.

Agindu bezala, berehala jarri da lanean Starmer, eta larunbat honetan egin du Downing Streeten -hemendik aurrera bere bulegoa eta egoitza ofiziala- gobernuburu berri gisa lehen bilera, kabinete estreinatu berriarekin.

Minuturik galdu gabe, atzo bertan osatu zuen taldea -aparteko ezustekorik ez kideei dagokioez-, lehen ministro gisa nazioaren aurrean lehen hitzaldia eman eta minutu gutxira, Karlos III .a erregeak gobernua osatzeko enkargua eman ondoren.

Gaur emandako prentsaurrekoan etorkizuneko erronkak eta gakoak argitu ditu. Migrazioari dagokionean, azaldu duenez, "hilda eta lurperatuta" dago aurreko Gobernu kontserbadorearen immigrazio plan eztabaidagarria, 'Ruanda plana' deiturikoa, Mantxako kanaletik Erresuma Batura txalupa txikietan asiloa eskatzeko asmoz iritsen diren migratzaileak Ruandara deportatzeko plana.

"Ruandako plana hilda eta lurperatuta zegoen martxan jarri aurretik ere. Inoiz ez da disuasio-elementua izan", esan du Starmerrek," eta ez nago prest inor uxatzeko balio ez duten txingarrak bizitzen jarraitzeko", azpimarratu du. Bere aurrekoaren esanetan, Afrikako herrialdera deportatzeko plan horrek iritzia aldaraziko zien Erresuma Batuan sartzen saiatzen ari diren ehunka migratzaileei, batez ere Mantxako kanalaren ibilbide arriskutsuaren bidez. Horren aurrean, Starmerrek esan du begiratu besterilk ez dagoela urte hasieratik Erresuma Batuak jaso duen migratzaile kopurua "errekorra, lehen sei hilabeteetan", azpimarratu du.

Gainera, erronka fiskalei "zintzotasun osoz" aurre egingo diela agindu du Starmerrek, baina "erabaki zailak hartu beharko dituela" onartu du, "baita laster hartu ere".

Halaber, Gobernu laborista baten "lehen egitekoa" hazkunde ekonomikoa bultzatzea dela adierazi du, eta hazkunde hori "herrialde osoan" gertatzen dela ziurtatuko duela.

Datorren asteartean, Starmer Washingtonera joango da NATOren goi-bileran parte hartzera, Erresuma Batuak Aliantzari ematen dion babesa argi uzteko. Ildo horretan, azpimarratu du segurtasuna eta defentsa izango direla Gobernuaren "lehen zeregina".

Era berean, Erresuma Batuak hartuko du Europako Erkidego Politikoaren hurrengo goi-bilera, uztailaren 18an.