Keir Starmer, 14 urteren laboristak boterera eraman dituen abokatua

Keir Starmer abokatuak Alderdi Laborista Erresuma Batuko gobernura itzularaztea lortu du, 14 urtez Alderdi Kontserbadoreak agindu ondoren.

Bere lorpenek baino kontserbadoreen akatsek eta eskandaluek ahalbidetu dute ziklo aldaketa Erresuma Batuan: Boris Johnsonen festak pandemia garaian, Liz Trussen zerga neurriak, eta Rishi Sunaken Ruandako deportazio plana, besteak beste. Testuinguru horretan, Starmerren hanka sartze batek soilik eragotzi zezakeen bera lehen ministro izatea. Ez da horrelakorik gertatu, ordea.

Starmerren ideologiaren zutabe nagusiak hauek dira: diziplina fiskala, zorroztasuna kontuetan, promesa egingarriak eta seriotasuna kudeaketan.

1962an jaio zen Surreyn, Londres hegoaldean, tradizioz burgesa eta kontserbadorea izan zen eremu batean, eta bere biografiaren arabera, beti lekuz kanpo sentitu omen zen.

Bere aitak, ezkerreko ideologia zuen artisauak, berebiziko garrantzia izan du bere bizitzan. Lanetik kanpo aitak ama zena zaintzen igarotzen zuen denbora, gaixotasun arraro bat baitzuen.

Unibertsitate ikasketak Leedseko Unibertsitatean egin zituen lehenik, eta, Oxforden, gero.

2008an Fiskaltzaren buru izatera iritsi zen, abokatu gisa giza eskubideen alorrean fama eta izen ona lortu ondoren. 2015ean Ministerio Publikoa utzi zuen politikara jauzi egin eta hauteskundeetan laboristen hautagai gisa aurkezteko.

Jeremy Corbyn laboristen buru zenaren arreta bereganatu zuen eta bere taldean sartu zuen: Immigrazioko bozeramaile gisa lehenik, eta brexitaren bozeramaile, gero.

2019ko hauteskundeetan izandako porrotaren ondotik, Corbyn ordezkatu zuen Alderdi Laboristaren buruzagitzan. Aurrekoak ez bezala, alderdia eskuinerago eraman du.