Milaka pertsona kalera atera dira Frantzian, ultraeskuinaren gorakadaren aurka

Milaka pertsona kalera atera dira gaur Frantziako hainbat tokitan, Parisen esaterako, eskuin muturraren gorakadaren arriskuaz ohartarazteko. Emmanuel Macron presidenteak hauteskundeak aurreratzea erabaki zuen igandean Europako Parlamenturako hauteskundeen emaitzak ezagutu ostean, eta baliteke Fronte Nazionalak lortzea garaipena, inkesten arabera.

Parisen bi martxa izan dira, eta Errepublika plazatik abiatu eta Nazio plazan elkartu dira. Antzolatzaileen arabera, 640.000 pertsona manifestatu dira gaur Frantziako 150 hiri eta herritan. Poliziak emandako datua, berriz, oso bestelakoa izan da, horren arabera, guztira 250.000 pertsona elkartu baitira protestetan.

Fronte Nazional ultraeskuindarrak lortutako "emaitza adierazgarria" deitoratu dute ibilbidean; izan ere, beldur dira eskuin muturrak ez ote duen "boterea eskuratuko" hurrengo hauteskundeetan.

Euskal Herria Bai koalizio abertzale eta ezkertiarrak eta ezkerreko beste alderdi batzuek osatzen duten Fronte Popular Berria aliantzako ordezkariek bat egin dute deialdiarekin, eta eskuin muturraren arriskuaz ohartarazi dute. Sindikatuetako eta giza eskubideen aldeko elkarteetako ordezkariak ere atera dira kalera.

Guztira 200 manifestazio inguru egingo dituzte asteburuan Frantzian, eta 300.000 eta 350.000 pertsona artean bilduko dira, 50.000 eta 100.000 artean hiriburuan.

Testuinguru horretan, 1.500 pertsonak Baionako erdiguneko kaleak zeharkatu dituzte eskuin muturraren gorakada geldiaraztea eskatzeko; izan ere, ekainaren 30ean eta uztailaren 7an garaipena lortuz gero, Bigarren Mundu Gerraz geroztik (Charles de Gaulle buru zela) Frantziak inoiz izan duen gobernurik eskuindarrena izango luke.

1:22

Inkestek Fronte Nazionalari ematen diote garaipena, baina ezkerreko alderdiek gora egin dute azken egunotan, Fronte Popular Berriaren sorrerari esker.

Marine Le Penen alderdiak Europako hauteskundeetan lortutako garaipenak lurrikara politikoa eragin du Frantzian.