Bi hildako Errusiak udaberritik drone eta misilak erabiliz Kieven aurka egindako eraso handienean

Bi segurtasun-guardia hil dira gaur goizaldean Xevtxenko distrituan (Kiev). 26 eta 46 urteko gizonezkoak Ukrainako aireko defentsek eraitsitako errusiar jaurtigaien zatiek harrapatu dituzte, hiriburuko Administrazio Militarrak jakitera eman duenez. Jaurtigai zatiek kalteak ere egin dituzte, eta suteak eragin dituzte Darnetsia distrituan.

Udaberritik Errusiak Kieven egin duen erasorik handiena izan da, eta gutxienez hiru pertsona zauritu dira hiriko zenbait distritutan jaurtigai zatiek harrapatuta. "Etsaiak eraso masibo konbinatua egin du droneak eta misilak erabiliz", azaldu du Kieveko Administrazio Militarreko buru Sergei Popkok. Horren arabera, Ukrainako Aire Armadak hogei jaurtigai baino gehiago atzeman ditu hiriburuko zeruan.

Popkoren esanetan, Errusiak bi fasetan egin du eraso bart. Iranek diseinatutako kamikaze droneak bidali ditu lehen oldarraldian, eta, gero, misilak jaurti dituzte borrokarako hegazkin estrategikoetatik.