Mundua -
Ameriketako Estatu Batuak
AEBko komunikabide kontserbadoreak Trumpi bizkarra ematen hasi dira
Horrela, 'New York Post', Fox News eta 'The Wall Street Journal' agertutako informazioek gero eta distantzia handiagoa erakusten dute Alderdi Errepublikanoaren eta presidente ohiaren gertuko komunikabide horien artean.
Agentziak | EITB Media
Ameriketako Estatu Batuetako komunikabide kontserbadore nagusietako batzuk, hala nola New York Post, Fox News eta The Wall Street Journal, bizkarra ematen hasi zaizkio Donald Trump presidente ohiari (2017-2021), errepublikanoek hauteskundeetan hedabide askok iragarri zuten garaipena lortu ez ostean.
Eskuineko komunikabideetan, liberaletan zein kontserbadoreetan, agertutako artikuluek, horrela, gero eta distantzia handiagoa erakusten dute Alderdi Errepublikanoaren eta presidente ohiaren gertuko hedabide horien artean, guztiek ziurtzat jotzen baitute hauteskundeetara berriro aurkezteko asmoa duela.
Rupert Murdoch handi-mandiaren New York Post egunkari kontserbadoreak argitaratu du bere azalean Trumpen karikatura, harresi batean eserita, eta dio Trumpek "saboteatu" egin zituela agintaldi erdiko hauteskundeak hautagai errepublikano okerrak proposatzean.
Iritzi artikulu batean, John Podhoretz kazetariak agintari ohia "toxiko" gisa deskribatu du: "Astearte gaueko emaitzek iradokitzen dutena da Trump dela, beharbada, AEBko historia modernoan izan den boto uxatzailerik onena", idatzi du egunkarian.
The Wall Street Journal egunkariari dagokionez, Trumpi leporatu dio agintaldi erdiko hauteskundeetan espero zen olatu gorria (errepublikanoen kolorea) ez lortzea.
"Trumpen hautagai errepublikanoek porrot egin zuten irabazteko modukoak ziren estatuetan. Baliteke porrot horiei alderdiak 2024a baino lehen jaramon behar izatea ", dio editorialak, "Trump Alderdi Errepublikanoaren galtzailerik handiena da" izenburuko iritzi pieza batean.
The Washington Post zentristak ere jaso du ildo hori, iritzi-artikulu batean adierazi duenez, "herrialdeak ezetz esan dio" Alderdi Errepublikanoari, "amorrua eta Trump eskaini dituelako", eta gaineratu du "gehiengo handi bati (% 58, hauteskunde egunean boto-emaileei egindako inkesten arabera) ez zaiola presidente ohia gustatzen".
Trumpek ospea galdu ahala, Ron DeSantis Floridako gobernadore berriak komunikabideen faboritismoa bereganatu du, baita Fox Newsen ere, Trumpen azken urteetako hedabide gustukoena: "Ron DeSantis Alderdi Errepublikanoaren buruzagi berria da", dio Liz Peekek.
