Errusiak hiru egunez itxiko du 'Nord Stream 1' gasbidea, "mantentze-lanak" direla eta

Abuztuaren 31tik irailaren 2ra arte egongo da itxita gasbidea. Gakoa da Europa erdialdeko gas hornidurarako.

Eguneko 33 milioi metro kubikorekin berrartuko du Gazpromek gas jarioa. Argazkia: EFE

agentziak | eitb media

publikatuta: 2022/08/19 21:20 (UTC+2)

azken eguneratzea: 2022/08/19 21:14 (UTC+2)

Europa erdialdeko gas hornidurarako gakoa den 'Nord Stream 1' gasbidea itxita egongo da abuztuaren 31tik irailaren 2ra arte, Gazprom konpainiaren arabera. "Mantentze-lanak" argudiatu ditu enpresak etenaldi hori justifikatzeko.

Erraldoi errusiarrak azaldu duenez, aktibo dirauen ponpaketa geltoki bakarra aldi baterako etengo da eta, behin lanak bukatuta, gas jarioari berriro ekingo diote eguneko 33 milioi metro kubikorekin, Interfax agentziaren arabera.

Alemaniak gasbide horrekiko konfiantza azaldu du barne eskaria asetzeko, 'Nord Stream 2' proiektu alternatiboa baztertu ondoren, otsailean Errusiak Ukrainari eraso egin zionetik.

Ostiral honetan, Olaf Scholzen Gobernuak baztertu egin du 'Nord Stream 2' berpizteko aldi baterako salbuespenik onartu daitekeenik, Wolfgang Kubicki liberalen liderrak hala proposatu ostean.

Hau zure interesekoa bada, baliteke beste gai hauek ere izatea

Nazioarteko berriak Europa Errusia Alemania argazkiak Prentsa digitalaren azken orduko Gaurko azken ordukoa Gasaren krisia Europan Errusia-Ukraina gerra azken ordukoa

Errusiak hiru egunez itxiko du 'Nord Stream 1' gasbidea, "mantentze-lanak" direla eta

Esteka kopiatuta