Mundua -
Energia
Gazpromek ahal duen gas guztia bidaltzen dio Europari, Errusiaren arabera
Mendebaldeak Errusiari jarritako zigorrek "ponpaketarako beharrezkoak diren" mantentze-lanak egitea eragozten dute Nord Stream 1ean, Errusiatik Europa Erdialderaino doan gasbide handienean.
Agentziak | EITB Media
Gazprom ahal duen gas guztia hornitzen ari da Europa Erdialdera, Dmitri Peskov Errusiako Presidentetzako bozeramaileak azaldu duenez. Errusiako gas konpainiak Alemaniara bidaltzen duen gasa % 20raino murriztu du, Nord Stream 1 gasbidetik (Errusiatik Europako gainerako herrialdeetara doan gasbiderik handiena), hura mantentzeko materialik ez dagoelako, Kremlinek azaldu duenez.
"Gazpromek, hornitzaileak, behar den guztia eta ahal den guztia bidaltzen du", esan du Peskovek prentsaurreko batean, baina gaur egun "aukera tekniko gutxiago dago ponpatzeko", Europar Batasunak ezarritako murrizketak eta zigorrak direla eta.
Gasbidea geldirik egon da mantentze-lanengatik, eta, EBren hasierako beldurra gorabehera, konponketak amaitu ondoren berriro hasi zen martxan. Hala ere, Peskovek azaldu duenez, "zigor horiek ez zuten aukerarik eman ponpatzeko beharrezkoak ziren mantentze-lan teknikoak egiteko, piezak aldatzeko, konponketa orokorrak egiteko eta ekipoei arauzko beste lan batzuk egiteko", eta "lan horiek egin ahala, Gazpromek ponpaketa handitzeko aukera izango du".
"Gazprom bere betebeharrak betetzen duen bermatzaile fidagarria izan da eta oraindik da, baina ezin du hornidura bermatu inportatutako ekipoek ezin badute mantentze-lan teknikorik jaso Europako zigorren ondorioz", zehaztu du bozeramaileak.
Errusiak argudiatzen du EBk eta Mendebaldeak ezarritako zigorrek konponketa-lanak zailtzen dituztela, besteak beste, materiala ezin dutelako inportatu beste tokietatik, Kanadatik esaterako, eta zigorren blokeoarekin topo egiten dutelako. Olaf Scholz Alemaniako kantziler sozialdemokratak eta Robert Habeck Ekonomia eta Klimaren Babeserako ministro berdeak diote ez dagoela oztopo teknikorik Nord Streamen bidez Errusiako gas-fluxua erregularra izateko.
Otsailean, Errusiak Ukrainaren inbasioa hasi baino egun batzuk lehenago, Alemaniak Nord Stream 2 gasbidea martxan jartzea geldiarazi zuen. Gasbide horrek Errusiatik etorritako fluxua handitu behar zuen, eta ia osorik eraikita dago.
