Aljeriak kanpo merkataritzako operazio guztiak izoztu ditu Espainiarekin, Adiskidantza Ituna hautsi ostean

Aljeriako Banku eta Finantza Erakundeen Elkarteak agindua eman du, gaurtik, Espainia jatorri edo helmuga duten merkataritzako operazio guztiak izozteko. Horrek, finean, Espainiaren eta Aljeriaren arteko merkataritza etetea esan nahi du. Espainiako Gobernuaren arabera, ordea, ez dio eragingo gas hornidurari.

Aljeriak Espainiarekin 2002tik zuen Adiskidantza Ituna bertan behera utzi eta gutxira etorri da erabakia. Espainiak Mendebaldeko Sahararako Marokoren autonomia planari babesa eman izanari egotzi dio.

Jose Manuel Albares Espainiako Atzerri ministroaren esanetan, Aljeriako Gobernuak "maila goreneko bermeak" eman dizkio bazkide eta hornitzaile "fidagarri" gisa, migrazioa edo gasa bezalako gaietan.

Aljeria "bazkide eta hornitzaile fidagarria" dela azpimarratu du Jose Manuel Albares Atzerri ministroak. "Maila goreneko bermeak eman dira eta ezerk ez du adierazten horrela izango ez denik", adierazi du.