Tonga "aurrekaririk gabeko hondamendi" batean murgildurik dago tsunamiaren ostean

Tongako Gobernuak sumendiaren erupzioa eta tsunamia "aurrekaririk gabeko hondamendi" bezala deskribatu ditu astearte honetan, egunak isilik eman ondoren. Hego Pazifikoko artxipelagoan hiru hildako baieztatu dituzte.

Larunbatean hondamendi naturala gertatu zenetik egindako lehen adierazpen ofizialean, Hunga Tonga Hunga Ha'apai sumendiaren erupzioak 15 metroko olatuak eragin zituela azaldu du Gobernuak. Tsunamiak artxipelagoaren zenbait uharte astindu zituen. Guztira, 169 irlak osatzen dute artxipelagoa.

Hildakoak Erresuma Batuko emakume bat, 65 urteko beste emakumezko bat Mango uhartean eta 49 urteko gizonezko bat Nomuka irlan dira.

Komunikazioen etenak Exekutiboaren adierazpena atzeratu du. Hondamendiak Mangoko etxe guztiak suntsitu ditu. 36 biztanle ditu uharte txikiak. Era berean, Fonoifua irlan bakarrik bi etxebizitza geratu dira zutunik. Nomukarekin batera uharterik astinduenak izan dira.

Gobernuak bi ontzi militar bidali ditu laguntza humanitarioarekin. Baldintza zailak dira hondamendiak kostaldea suntsitu eta errautsak lurraldea estali duelako.

Edateko uraren eskasia

Arazo larrienetako bat edateko uraren eskasia da, Exekutiboak zehaztu duenez. Zeelanda Berria eta Australia bezalako nazioekin lankidetzan konpondu nahi dute.

Zeelanda Berriko Itsas Armadako bi ontzi Tongara abiatu dira gaur laguntza humanitarioarekin. Ostiral honetan bertan heltzea espero dute. Bitartean, Australiak beste ontzi bat prest du, edateko 250.000 litro ur eta beste 70.000 litro ekoizteko gaitasuna duen gatzgabetze instalazioekin.

Gurutze Gorriak uste du 80.000 pertsona ingururi kalte egin diela hondamendi naturalak. Gainera, adituek sumendien erupzio berriak gertatzea ez dute baztertzen.

Zeelanda Berriko hegazkinek astearte honetan ateratako irudietan ilargia-paisaia ikus daiteke. Errautsak guztia hartu du, eta Tongatapu uharteko eraikinetan kalte handiak eragin ditu hondamendiak. Nuku'alofa hiriburua bertan dago.

Itsaspeko kablea hautsita

Herrialdea ia inkomunikaturik egonda da, itsaspeko kablea hautsi delako kostaldetik 37 bat kilometrora. Komunikazio telefoniko guztiak eta Internet konektatzen ditu.

Hunga Tonga Hunga Ha'apai sumendiaren erupzio burrunbatsua ehunka kilometrora entzun eta espaziotik ikusi zuten. Sumendia lurrazaletik desagertzea eragin zuen.

Itsaspeko jarduera kontrolatzeko lana oztopatzen du sumendiaren desagerpenak. Larunbateko erupzioa azken 30 urteetako bortitzenetako bat izan da.