Mundua -
KORONABIRUSA
Italiak koarentena ezarriko die herrialdera sartzen direnei, Gabonetan
Abenduaren 21etik urtarrilaren 6ra debekatuta egongo da eskualdeen arteko mugikortasuna eta abenduaren 25ean, 26ean eta urtarrilaren 1ean ezingo da udalerritik atera. 993 pertsona hil dira 24 ordutan.
AGENTZIAK | ERREDAKZIOA
Italiako Gobernuak neurri murriztaileak areagotu ditu Gabonei begira, eta abenduaren 21etik urtarrilaren 6ra bitartean atzerrian egon eta herrialdera sartzen direnei koarentena ezarriko die. Hirugarren olatua ekiditea da helburua.
"Urtarrilaren 21etik 6ra bitartean atzerrira joaten diren italiarrek berrogeialdia egin beharko dute", eta gauza bera gertatuko da egun horietan Italiara bidaiatzen duten turistekin ere, Giuseppe Conte Italiako lehen ministroak atzo prentsaurreko batean adierazi zuenez.
22:00etatik 05:00etara etxeratze agindua egongo da indarrean, Gabon Zahar egunean salbu. Abenduaren 31n etxeratze agindua 07:00ak arte luzatu dute.
Arrisku gutxieneko eremuetan, gune hori izendatutakoetan, tabernak, jatetxeak eta pizzeriak zabalik egon ahal izango dira bazkalorduan, 18:00ak arte, eta etxera eramateko janaria eskaini ahal izango dute.
Eremu laranjetan eta gorrietan, ostera, etxera eramateko janaria eskaini ahal izango dute, 22:00ak arte.
Atzo, Italian, koronabirusarekin kutsatutako 993 hildako zenbatu zituzten, pandemia hasi zenetik egun bakar batean izandako kopururik altuena. Covid-19ak 1.664.829 kutsatu eta 58.038 hildako eragin ditu Italian, otsaila amaieran lehen positiboa atzeman zutenetik.
