Mundua -
Koronabirusa
Koarentena zazpi egunetara murriztu du Frantziako Gobernuak
Horrez gain, kutsatzeen jarraipena egiteko eta kontaktu estuak bilatzeko 2.000 langile gehiago kontratatuko dituela iragarri du.
AGENTZIAK | ERREDAKZIOA
Koronabirusarengatik ezarritako koarentena 14 egunetik zazpira murriztea erabaki du ostiral honetan Frantziako Gobernuak.
"Isolamendua zazpi egunekoa izango da aurrerantzean, lehendabiziko zazpi egunetan baitago kutsatzeak gertatzeko arrisku gehien", adierazi du Jean Castex lehen ministroak.
Azkenaldian egoerak nabarmen egin du okerrera Frantzian: 8.000 positibo inguru izaten ari dira egunero.
"Birusa gero eta gehiago zabaltzen ari da, eta ospitaleratzeak ugaritu egin dira", ohartarazi du.
Azken astean, milioi bat test egin dituzte, baina Gobernua osasun sistema arindu nahi du, sintomak dauzkaten eta arriskuan dauden pertsonek lehentasuna izan dezaten.
Itxaron zerrendak arintze aldera, Frantziako Gobernuak iragarri du 2.000 profesional gehiago kontratuko dituztela kutsatzeen jarraipena eta kasu susmagarriak detektatzeko. Halaber, ordutegi bereziak ezarriko dituzte laborategietan premiazkoak diren kasuei lehentasuna emateko.
Testuinguru honetan, 42 departamentutan alerta gorria ezarri dute, eta Marseilla, Burdeos eta Guadalupeko prefektuei epidemiaren kontrako neurri murriztaile berriak hartzeko eskatu die Gobernuak.
Halaber, eta herritarrak udan gehiegi lasaitu direla iritzita, segurtasun-distantzia mantentzea, eskuak sarritan garbitzea eta musukoa erabiltzea ezinbestekoa dela gogoratu du Gobernuak.
