Koronabirusarekin kutsatutako objektuak ukitzeko arriskuaz ohartarazi du Txinak

Agintariek COVID-19a aurkitu dute supermerkatu kate bateko elikagai izoztu batzuen bilgarrietan. Produktu horiek beste herrialde batzuetatik inportatzen zituzten.

Agentziak | Erredakzioa

publikatuta: 2020/08/19 13:22 (UTC+2)

azken eguneratzea: 2020/08/19 18:16 (UTC+2)

Txinako Osasun Batzorde Nazionalak adierazi du koronabirusarekin kutsatutako objektuekin kontaktuan egoteak infekzioak eragin ditzakela, Asian supermerkatu-kate batekin lotuta dauden COVID-19aren hainbat kasu baieztatu ostean.

Joan den ostiralean, Brasildik inportatutako oilasko izoztuen hegalabur sorta baten laginek positibo eman zuten probetan, eta aurreko egunean, Wuhu ekialdeko hiriko jatetxe batean egindako ohiko ikuskatze batean, Ekuadorretik zetorren itsaskiaren kanpoko paketean atzeman zuten birusa.

Shandong probintziako portu-hiri batean izoztutako arrainen bilgarriaren laginetan ere birusaren arrastoak aurkitu dituzte.

Txinako hedabideak kezkatuta agertu dira Latinoamerikan pandemiak duen garapenagatik, bai Brasilen, bai Ekuadorren. Orotara 5,6 milioi kasu baino gehiago baieztatu dira. Produktuek ez ezik, bilgarriek ere birusa transmititu diezaiekete kontsumitzaileei.

"COVID-19aren infekzio-iturri handiena baieztatutako positiboak eta birusaren eramaile isilak dira. Inkubazio aldian daudenek ere birusa transmititu dezakete", gaineratu du Txinako Slud Batzorde Nazionalak.

Txinak 84.888 kutsatu zenbatu ditu pandemia hasi zenetik, eta 4.634 pertsona hil dira.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu eta EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn uztailaren 16tik, eta Nafarroan, uztailaren 17tik. Iparraldean, "espazio publiko itxietan" derrigorrezkoa da uztailaren 20tik.

Hau zure interesekoa bada, baliteke beste gai hauek ere izatea

Nazioartea Txina Gaixotasunak Eguneko albisteak Albisteak Osasun albisteak Medikuak Erizaintza Sendagaiak Asia Koronabirusa Munduko Osasun Erakundea

Koronabirusarekin kutsatutako objektuak ukitzeko arriskuaz ohartarazi du Txinak

Esteka kopiatuta