AEBn 100.000 pertsona baino gehiago hil dira jada COVID-19a dela eta

Ameriketako Estatu Batuetan (AEB) dagoeneko 100.000 pertsona baino gehiago hil dira COVID-19 gaitzak eragindako pandemiaren ondorioz. Ondorioz, kopuru hori gainditzen duen munduko lehen herrialdea da, estatu jakin batzuetan atzemandako kasuen gorakada kezkagarriaren aurrean osasun arloko adituak herritarrei ardura eskatzen ari direnean. Dena dela, agintariek ekonomia suspertzeko ahaleginekin jarraitzen dute.

Johns Hopkins Unibertsitateak AEBn 20:00ak zirenean (osteguneko 00:00ak GMT) zabaldutako datuen arabera, orain arte 100.276 pertsona hil dira koronabirusaren ondorioz herrialdean (asteartean baino 1401 gehiago) eta 1.698.581 herritar kutsatu dira (18.200 azken orduetan).

Horrela, hildakoen kopuruak Etxe Zuriak pandemiaren hasieran egindako estimazio baxuena gainditu du jada; izan ere, koronabirusaren ondorioz hildakoak 100.000 eta 240.000 pertsona artean izango zirela aurreikusi zuen.

Ildo horretatik, Anthony Fauci Gaixotasun Infekziosoen AEBko Institutuko zuzendari eta Etxe Zuriko lantaldeko arduradunetako batek zuhurtziarako deia egin du ekonomia suspertzeko prozesuan, eta arduraz jokatzeko eskatu die herritarrei.

Hala, gaitzari aurre egiteko operatiboa kudeatzen duten AEBko estatuak oreka aurkitu nahian ari dira lanean jarduera ekonomikoaren bultzadaren eta agerraldi berriak saihesteko zuhurtziaren artean.

Beheranzko joera nagusitu arren, 15 estatutan kutsatze kopuruak gora egin duela erakusten dute datuek; besteak beste, Floridan, Virginian, Ipar Karolinan, Arkansasen, Wisconsinen eta Alabaman.

Kezkatzeko beste arrazoi bat egun hauetan hondartzetan eta bestelako leku publikoetan pilatutako jendetza da, Virginian, Floridan (ekialdeko kostaldean), Alabaman, Texasen eta Louisianan, esaterako. Jende pilaketa horiek kezka eragin dute osasun arloko profesionalen artean, datozen egunetan kasuek gora egingo duten beldur.