Johnson: 'Prest nago Europar Batasunarekin hitz egiteko'

Erresuma Batuko lehen ministro gisa lehen agerraldia zuen gaur Boris Johnsonek Komunen Ganberan. Espero zen bezala, brexit-a hartu du gai nagusitzat. Iragarri duenez, Europar Batasunarekin (EB) "nahi duenean unean eta nahi duen lekuan" hitz egiteko prest agertu da, baina betiere epemuga beteta: alegia, urriaren 31.

Elkarrizketok "fede onez eta adiskidetasunez" egin behar direla uste du Alderdi Kontserbadoreko buruzagi berriak. Nabarmendu duenez, jarraibideak eman ditu jada Erresuma Batua urriaren 31n EBtik ateratzeko, akordioarekin edo hura gabe.

"Nahiago nuke Europar Batasunetik akordio batekin joatea, uste dut posible dela, azken unean bada ere. Horren alde eginahalak egingo ditut", adierazi du.

Dena dela, ohartarazpena ere egin du politikari euroeszeptikoak: Europak Irlandako klausula kendu behar du. Johnsonek ez du baldintza hori onartzen, eta hori izan da negoziazioen oztopo nagusia.

Irlandako klausulak brexit-aren ostean bi Irlanden arteko muga fisikoa saihestea du helburu. Hori horrela, Ipar Irlanda merkatu bakarraren hainbat arau eta aduanako muga indarrean egongo lirateke, Erresuma Batuko gainerako lurraldeetan ez bezala.