Mundua -
ERRESUMA BATUA
Erresuma Batua urriaren 31n EBtik ateratzea bideragarria da, Boris Johnsonen arabera
Bestalde, Theresa May ordezkatzeko lasterketan, bera da hautagai nagusia Alderdi Kontserbadorearen barruan egindako bigarren bozketaren ostean.
AGENTZIAK | ERREDAKZIOA
Erresuma Batuan brexitak zeresana ematen jarraitzen du. Boris Johnson Erresuma Batuko Atzerri ministro ohi eta Londresko alkate ohiaren esanetan, "guztiz bideragarria" da Erresuma Batua urriaren 31n Europar Batasunetik (EB) ateratzea. Johnsonek azpimarratu duenez, data hori ez errespetatzeak "konfiantza galera ikaragarria" eragingo luke.
Theresa May ordezkatzeko lasterketari dagokionez, Boris Johnson da Alderdi Kontserbadoreko buru eta, horrenbestez, lehen ministro izateko hautagai nagusia. Hauteskunde primarioetan egindako bigarren bozketan, Boris Johnsonek 126 boto eskuratu zituen.
Atzerri ministro ohia bigarren bozketa gainditu duten lau hautagaiak izango ditu lehiakide: Jeremy Hunt Atzerri ministroa (46 boto); Michael Gove Ingurumen ministroa (41); Rory Stewart Nazioarteko Sustapen ministroa (37), eta Sajid Javid Barne ministroa (33).
Eztabaidan zehar, Gove eta Hunt hautagaiak brexita luzatzearen alde agertu ziren akordioa lortzeko asmoz. Stewarten esanetan, berriz, urriaren 31 aukera moduan jartzea "ez da errealista".
Mayk ekainaren 7an dimititu zuen, baina jarduneko lehen ministro izaten jarraituko du Alderdi Kontserbadoreak horren ordezkoa aukeratu arte.
