Mundua -
DARDARA
4,8 eta 5 graduko bi lurrikara sentitu dituzte Perun
Igandean, 8,3 graduko lurrikara handi batek herrialdea astindu zuen, eta bi herritar hil eta 15 zauritu ziren.
AGENTZIAK | ERREDAKZIOA
Richter eskalan 4,8 eta 5 graduko bi lurrikara izan dira bart Perun, eta kezka eragin dute Lima hiriburuan eta Arequipa hirian. Igandean 8,3 graduko astindua izan zen Amazoniako Loreto eskualdean, eta inguruko zenbait lurraldetan ere sentitu zen; Kolonbian, Ekuadorren eta Brasilen, kasu.
Peruko Institutu Geofisikoak (IGP) jakinarazi duenez, 4,8 graduko dardara bertan 22:14 zirenean gertatu da.
Astindua Limako Callao portutik 57 kilometro mendebaldera gertatu da, Ozeano Barean, 32 kilometroko sakoneran.
Bigarren lurrikara, ostera, bertan 22:28 zirenean gertatu da Peru hegoaldeko Arequipa eskualdean eta Richter eskalan 5 graduko indarra izan du.
Lurrikarak Lomas udalerritik 63 kilometro hego-mendebaldera izan du epizentroa, 24 kilometroko sakoneran.
Igandean lurraldea astindu zuen 8,3 graduko lurrikararen ostean gertatu dira azken bi astinduak. Igandeko lurrikararen ondorioz, bi lagun hil eta 15 pertsona zauritu ziren. Horrez gain, 226 familia kaltetu dira Peru iparraldeko oihanean.
