Karguei uko egiteko eskatu die Madurok ministroei, berregituraketa helburu

Beren karguak Gobernuaren esku uzteko eskatu die Nicolas Maduro Venezuelako presidenteak bere ministroei, Gobernuko metodoetan eta funtzionamenduan "sakoneko berregituraketa" egiteko. Delcy Rodriguez presidenteordeak azaldu duenez, "edozein mehatxuren" aurrean herrialdea "blindatzea" da helburua.

Ez da Madurok bere ministroei uko egiteko eskatzen dien lehen aldia.

Ostiralean Madurok aurreratu zuen "laster" Gobernuaren metodoetan "sakoneko aldaketak" iragarriko zituela, herritarrei eskainitako arretan "sakontzeko".

Urtarrilaren 23an Juan Guaido Asanblea Nazionaleko presidenteak bere burua Venezuelako presidente izendatu zuenetik, herrialdea krisi politiko sakonean murgilduta dago.

1.000 inguru militarrek desertatu, eta Kolonbiara ihes egin dute

Kolonbiako Atzerri Ministerioak zabaldutako informazioaren arabera, dagoeneko 1.000 militar inguruk desertatu eta Kolonbiako muga zeharkatu dute, babesa eskatuz.

Militar horiek beren armak eta uniformeak entregatu dituzte, eta Kolonbiako agintarien zaintzapean daude orain.

Militarrek eta euren familiek osasun arreta, ostatua, lege aholkularitza eta elikagaiak jaso dituzte.

Talde hori osatzen duten asko eta askok babes eskaria egin dute Kolonbian.