Europan nazionalismoak izaten ari diren gorakada gaitzetsi du Macronek

Emmanuel Macron Frantziako presidenteak I. Mundu Gerran hildakoak gogoratu ditu Armistizioaren mendeurreneko hitzaldian. Gaur goizean, 70 Gobernu eta Estatubururen aurrean eman du hitzaldia Parisen, Garaipenaren Arkuan. Gerran hildakoak aipatu ditu, eragindako mina, eta historia aldatu zuen gatazka bat nola gainditu duen Europak. Bidenabar, nazionalismoa "abertzaletasunaren antitesia" dela esan du.

"1918ko azaroaren 11an, goizeko 11:00etan, duela 100 urte, Parisen, Frantzia osoan bezala, turuta eta kanpai hotsak entzun ziren" hasi du Macronek bere hitzaldia, Armistizioa indarrean sartu zen unea gogoratuz: "Lau urte luze eta lazgarri izan ziren. Frantzian bakarrik mila milioi bala jaurti ziren"

Bere hitzaldiaren zati handi bat Europan nazionalismoak izaten ari diren gorakada gaitzesteko erabili du Macronek. "Nazionalismoa abertzaletasunaren antitesia eta traizioa da" esan du, "lezioak ezin du beste nazioekiko ezinikusia izan, ezta iragana ahaztea ere" erantsiz.

Frantziako presidenteak esan du beldur dela "iraganeko mamuak piztu eta erlijioek manipulatzen dituzten ideologia berriak sortuko ote diren". "Mendeurren honetan, historiak noranzko hori hartzeko mehatxua sentitzen dugu" ohartarazi du.

Hitzaldiaren ostean, hainbat musika ekitaldi izan dira.

Trumpen kontrako protestak

Macronen hitzaldia hasi baino minutu batzuk lehenago, gonbidatuen tribunan, elkarri eskua eman diote Vladimir Putin Errusiako presidenteak eta Donald Trump AEBetakoak. Estatu Batuetan ikerketa irekita dago Errusiak AEBetako hauteskundeak Trumpen alde manipulatzen lagundu ote zuen argitzeko, eta ikerketa horretan biak nahastuta daude.

Han izan diren 70 agintarien artean, Pedro Sanchez, Espainiako erregea, Angela Merkel, Benjamin Netanyahu, Recep Tayyip Erdogan, Justin Trudeau eta Mohammed VI. zeuden, besteak beste, eta horietako gehienek arratsaldean Parisen izan den lehen Bakearen Foroan parte hartu dute. Trumpek ez.

16:00ak aldera Trump Parisen egotearen kontra protesta egin dute 'Bloke Beltza' antisistema taldeak deituta, 1.000 bat lagunek. Aurretik, Paris-Banliee Faxismoaren Kontrako Ekintza ezkerreko taldeak deitutako manifestazio bat ere egin dute.

10.000 jendarme eta polizia baino gehiago ari dira Parisen topaketa honen segurtasuna zaintzen.

Bakearen Foroak eman duena

Emmanuel Macron Frantziako presidenteak, Angela Merkel Alemaniako kantzilerrak eta Antonio Guterres NBEko idazkari nagusiak Pariseko foroa inauguratu dute, bakea babesteko dei eginda, hainbat albotatik mehatxu egin diotela uste izanda.

"Gaur askok bakea egiatzat jo dute, baina hala izatetik urrun dago", adierazi du Merkelek, Bakearen Foroan egin duen hitzaldian.

Frantziako presidenteak galdegin du ea etorkizunetik begiratuta igande honetan 84 estatuburuen eta Gobernuaren arteko bilera "batasun azken une bat izango ote den munduko desordena berri bat baino lehen".

Kantzilerrak bertara gonbidatu izanaren garrantzia nabarmendu du, eta hori, esan du, bi mundu gerren jatorrian izan arren, une hartan gobernatzen zutenenen ikuspegi osoaren faltagatik.

Bestalde, Antonio Guterres NBEko idazkari nagusiak ohartarazpen bat egin du, haren ustez, munduko bi gerratan amaitzea egin zuen "engranaje" geopolitiko antzekoa jarri da martxan.