Mundua -
EMISIOEN AUZIA
Volkswagenek zuzendaritza errugabetu nahi du
Automobil-fabrikatzaile alemaniarrak diesel motorren gas isurien manipulazioaren aurrean erantzukizunik gabe utzi nahi du konpainiako zuzendaritza-batzordea.
AGENTZIAK | ERREDAKZIOA
Volkswagen automobil-fabrikatzaile alemaniarraren esanetan, diesel motorren isuriak manipulatzearen erantzukizuna ez dagokio zuzendaritza-batzordeari.
Konpainiak asteazken honetan jakinarazi du ez duela erantzukizun zantzurik ikusi zuzendaritza-batzordeko kideen jokabidean. Ondorioz, ekainaren 22an izango den akziodunen batzar orokorrean, errugabe joko dute batzordea.
Volkswageneko ikuskaritza-batzordeak eta zuzendaritza-batzordeak esan dutenez, batzarra egin aurretik manipulazioarekin loturiko datu gehiago ezagutu ezean egingo dute proposamen hori.
"Oraindik bukatu ez bada ere, Jones Day abokatu-langela estatubatuarrak sakon ikertu du diesel motorren auzia, eta ikerketa horretan oinarrituta hartu da proposamen hori egiteko erabakia", azaldu du gaur Volkswagenek komunikatu batean.
Halaber, zuzendaritza-batzordeko gaur egungo edo aurreko kideek euren ardurak betetzeari utzi zioten ikertzeari utzi dio konpainia alemaniarrak.
