Mundua -
AMAREN BULARRA HARTZEA
NBEk desegokitzat jo ditu bular esnea babesten duten legeak
Horren suzedaneoen segurtasuna bermatzeko, eta hori modu desegokian salerostea eta ama-esnea publizitate helburuekin erabiltzea debekatzeko eskatu du.
AGENTZIAK | ERREDAKZIOA
Munduko Osasun Erakundeak (MOE), Haurren Laguntzarako Nazio Batuen Funtsak (UNICEF) eta Haurren Elikaduraren aldeko Taldeen Nazioarteko Sareak (IBFAN) amagandiko edoskitzea babesten dituzten legeak aztertzen dituen txosten bat argitaratu dute. Munduko herrialde gehienetan lege horiek "desegokiak" direla azpimarratu dute bertan.
Lanean aztertu diren 194 herrietako 135ek Ama-Esnearen Ondorengoen Komertzializazioko Nazioarteko Kodearekin eta Munduko Osasun Batzarrak onartutako ebazpenekin lotutako neurriren bat hartu dute. Hala ere, soilik 39 estatuk betetzen dituzte Kodearen ebazpen guztiak.
MOEk eta UNICEFek bizitzako lehen bi urteetan bakarrik gomendatzen dute haurrak ama-esneaz elikatzea, baina bi urtetik gorakoek ere jarraitu ahal dute hartzen. Testuinguru horretan, MOEko kideek haurren bizitzako lehen sei hilabeteetan amagandiko edoskitzea gutxienez % 50 bat handitzeko konpromisoa hartu dute 2025erako.
Kodean, amaren bularra hartzea babesteko eskatu diete herrialde horiei, eta amaren esnearen suzedaneoak (haurrentzako esneak, barne), biberoiak eta tetinak modu desegokian merkaturatzeari uzteko. Amaren esnearen suzedaneoak, beharrezkoak direnean, modu seguruan erabiltzen direla bermatzea ere du helburu. Halaber, amaren esnearen suzedaneoak sustatzeko modu guztiak debekatu ditu, baita horien publizitatea egitea, osasunaren arloko langileei opariak ematea eta doako aleak banatzea ere.
Kontsonantzia, komertzializazioa eta elkarlana
Oro har, gehiago dira kode horrekin bat datorren araudia duten herrialdeak Asia hego-ekialdean, Afrikan eta Mediterraneo ekialdean. Bestetik, amaren esnearen suzedaneoen salerostea kontrolatzeko legeak dituzten herrialdeen artean, erdiak pasatxo dira horien publizitatea eta promozioa egitea debekatzen dutenak.
MOEk eta UNICEFek berriki adostu dute mundu mailan kode horren aplikazioa jarraitzeko eta bultzatzeko sarea (Netcode), herrialde eta herritarren gaitasuna indartzeko kodean biltzen diren legeak gainbegiratzeko eta betearazteko. Gobernuz kanpoko zenbait erakunde (IBFAN, Helen Keller International eta Save the Children, besteak beste) sare horretara batu dira.