Frantzia eta Erresuma Batua, Calaisen harian:'Irtenbidea ez da erraza'

Frantziako eta Erresuma Batuko agintariek ziurtatu duenez, eurentzat "lehentasun handiena" Calaisko portuan immigrazioa dela eta sortuta krisiari aurre egitea da, baina ohartarazi dute konponbidea ez dela "erraza" eta ez dagoela soilik euren esku.

Bernard Cazeneuve eta Theresa May Frantziako eta Ingalaterrako Barne ministroek, hurrenez hurren, adierazpen bat adostu eta zabaldu dute eta, bertan adierazi dutenez, epe luzean, "immigrazioari aurre egiteko murriztu egin beharra dago Afrikatik Europara datozen pertsonen kopurua arazo ekonomikoek bultzatuta".

Aste honetan, milaka pertsona saiatu dira Mantxako Itsasartearen azpian dagoen tunelean -Frantzia eta Erresuma Batua lotzen dituena- sartzen, garraiobideetan zenbait arazo eraginda.

"Askoren ustean, Europak eta, gehien bat, Erresuma Batua itxaropenaren sinonimo dira. Ilusio horrek (pertsona) trafikatzaileen merkatua elikatzen du, hori dela eta, herrialde afrikarrak lagundu behar ditugu, garapen ekonomiko eta sozialaren garapenean aurre egin ahal izateko", esan dute oharrean.

Bi ministroek oharrean -Le Journal du Dimanchek zabalduta- ohartarazi dutenez, "ez dago konponbide errazik" eta bietako inork ezin dio bere kabuz aurre egin handituz doan arazo horri.

"Halere, Frantziaren eta Britainia Handiaren arteko harremanen sendotasuna eta gure herrialdeek Europan duten pisua, gai horri dagokionez, oinarrizkoak dira irtenbiderako", gaineratu dute Cazeneuvek eta Mayk.

Gainera, azaldu dutenaren arabera, Europak "beti eskainiko die babesa gatazketatik edo jazarpenetatik ihesean daudenei", baina, ohartarazi dutenez, haustu egin beharra dago "Mediterraneoaren ibilbidearen eta Europan ekonomia arazoengatik instalatzeko ideiaren arteko lotura".