Mundua -
Presidentetzarako bozak
Al Sisik oso garaipen zabala lortu du Egipton
Lehenengo datuen arabera, Armadaren buru ohiak botoen % 95 baino gehiago eskuratu ditu. Abstentzioa altua izan da, nahiz eta bozketa egun batez luzatu.
Erredakzioa
Abdelfatah al Sisi Armadako buru ohiak oso garaipen zabala lortu du Egiptoko presidentetzarako hauteskundeetan, botoen % 95etik gora eskuratuta, bertako hedabideek jakitera eman dutenez.
Presidentetza lortzeko bidean izan duen aurkari bakarrak, Hamdin Sabahi ezkertiarrak % 3ko babesa izan du soilik, lehenengo datuen arabera.
Al Ahram egunkariak zabaldu duenez, 2,2 milioi boto zenbatuta, Al Sisik % 95,35eko babesa jaso du; Sabahik, berriz, % 3,64koa.
Parte-hartzeari buruzko datuak ez dira oraindik oso argiak, eta iturriaren arabera aldatu egiten dira, baina gehienek % 40 eta % 50 artekoa izan dela esan dute.
Polemika handia izan da Egipton boto-emaile kopuruarekin, Hauteskunde Batzorde Gorenak bozketa egun bat luzatzea erabaki ostean. Izan ere, bozketa astelehenean eta asteartean bakarrik izan behar zen, baina bero handiaren ondorioz jende gutxi bertaratu omen zen hauteslekuetan bi egun horietan.
Orain, behin betiko zenbaketa egiteko epea ekainaren 5ean amaituko da, eta orduan jakingo dira datu ofizialak.
