Mundua -
Grezian aurkitutako umea
Bulgariako poliziak "Maria"ren guraso biologikoak aurkitu ditu
Ustezko guraso biologikoak galdekatzen ari da polizia. Hainbat komunikabidek ezagutzera eman dutenez, gurasoak Grezian bizi izan ziren orain hainbat urte eta han haur bat oparitu zuten.
Erredakzioa
Bulgariako poliziak "Maria" edo "Aingeru ile horia" bezala ezaguna den umearen guraso biologikoak aurkitu ditu. BNT telebistak jakitera eman dutenez, polizia ijito jatorriko bikotea galdekatzen ari da. Eskandinaviar itxurako umea Greziako ijitoen kanpamentu batean aurkitu zuten joan den astean.
Telebistak adierazi duenez, Atanas eta Sashka Rusevik dira gurasoak eta Nikolaevo herrixkan bizi dira, Bulgariako erdialdean. Bikoteak beste zortzi edo hamar ume ditu, horietatik erdiak ile horiak eta azal zurikoak. BNT telebistak dioenez, "Maria"ren antza dute.
Familairen bizilagunek Rusevis sendia orain zenbait urte Grezian bizi izan zela adierazi diete komunikabideei. Gaineratu dute haurraren truke 250 euro jaso zituztela, nahiz eta beste batzuk dirurik ez zutela jaso baieztatu.
15 urteko semeetako batek BGNES agentziari esandakoaren arabera, "amak Grezian bizi izan zirenean itzultzeko dirudik ez zutela eta, haur jaio berria han uztea erabaki zuen".
Vsekiden agentziari Sashkak egindako adierazpenetan, ustezko amak onartu egin du ume bat Grezian utzi izana, baina ez du zehaztasun gehiagorik eman nahi izan. "Orain denbora asko gertatu zen hori. Umea oparitu genuen. Ez dut dirurik jaso, jatekorik ez nuelako utzi nuen. Ez dakit nirea den, nirea dirudi, baina, nola jakin?", esan du.
BNTek azaldu duenez, DNA probak egingo dizkiote bikoteari "Maria"ren guraso biologikoak diren jakiteko.
